ФТБ собиқ ахборотчиси Россиядан Байденларга нисбатан компромат олган

АҚШ президенти Жо Байден ва унинг ўғли Хантерга қарши ёлғон кўрсатма берганликда айбланган Федерал тергов бюроси (ФТБ) собиқ ахборотчиси Александр Смирнов бу маълумотни Россия разведкасидан олганини тан олди, деб хабар берди Американинг CNN телеканали 20 феврал куни иш материалларига таянган ҳолда. Смирнов иши бўйича прокурорнинг сўзларига кўра, у ўтган йил охирида рус жосуслари билан учрашгандан сўнг «АҚШ сайловларига таъсир кўрсатиши мумкин бўлган янги ёлғонларни фаол равишда тарқатган», унинг Байденларга нисбатан сохта порахўрлик айбловлари оқибатлари эса «ҳамон сезилмоқда».

Александр Смирновнинг таъкидлашича, у хорижий разведка хизматлари вакиллари билан «кенг ва яқин» алоқада бўлган, дейилади иш материалларида. У, шунингдек, аввалроқ россиялик жосуслар, жумладан, юқори мартабали разведка ходимлари ва «чет элдаги россиялик қотиллар»га раҳбарлик қилганлар билан учрашганини тан олди, дея иш материалларидан иқтибос келтирган CNN телеканали. 

Смирновнинг ёлғон гувоҳлик бериш бўйича иши 

Ўтган ҳафта 43 ёшли Александр Смирнов хориждан АҚШга қайтаётганида Лас-Вегас аэропортида қўлга олинган эди. АҚШ махсус прокурори Девид Вайс Федерал тергов бюросининг собиқ ахборотчисини Жо Байден ва унинг ўғли Хантернинг Burisma Holdings украин энергетика компанияси билан битимларга алоқадорлиги ҳақида ёлғон кўрсатма беришда айблади. 

Айблов хулосасига кўра, Смирнов 2020 йилда Хантер Байден иши бўйича тергов жараёнида Burisma раҳбарияти унга 2015 ва 2016 йилларда Жо Байденнинг ўғлини компанияни «ҳар хил муаммолардан» ҳимоя қилиш учун «отаси орқали» ёллаганини тан олганини даъво қилган. Смирнов, шунингдек, Burisma раҳбарияти Украина бош прокурори ташаббуси билан компанияга оид тергов билан боғлиқ «барча масалаларни ҳал қилиш» учун Жо ва Хантер Байденнинг ҳар бирига 5 миллион доллар тўлаганини айтди. 

Жо Байден ўша йилларда Барак Обама кабинетида вице-президент эди. Хантер Байден 2014 йилдан 2019 йилгача Burisma директорлар кенгашида ишлаган. Кичик Байден устидан тергов олиб борувчи махсус прокурорнинг таъкидлашича, аслида Смирнов Burisma вакиллари билан 2015 ва 2016 йилларда эмас, фақат 2017 йилда, Байден Ср вице-президент бўлмаганида учрашган. Вайснинг баёнотида таъкидланишича, ахборот берувчи ўз кўрсатмасида порахўрлик айбловларини тўқиб чиқарган, чунки у президентликка номзод сифатида Жо Байденга нисбатан адоватда бўлган.