Интеллектуал мулк ҳуқуқларини бузганлик учун жавобгарлик кучайтирилади

Президент фармони билан тасдиқланган 2024 йилги давлат дастурида интеллектуал мулк ҳимоясини кучайтириш борасида бир қатор норматив ҳуқуқий-ҳужжатлар ишлаб чиқилиши белгиланди.

2024 йил ноябр ойига қадар интеллектуал кафолатли мулк ҳимоясини таъминлаш бўйича норматив-ҳуқуқий ҳужжат лойиҳасини ишлаб чиқиш режалаштирилмоқда.

Бош прокуратура, Божхона қўмитаси ҳамда техник тартибга солиш агентлиги ишлаб чиқадиган лойиҳада контрафакт маҳсулотларни олиб қўйиш ва йўқ қилишнинг аниқ механизмлари белгиланади. Ҳужжат лойиҳасида айрим турдаги маҳсулотларни (озиқ-овқат, алкогол, тамаки, шахсий гигиена воситалари ва бошқалар) савдога чиқаришдан олдин рақамли маркировкалашда интеллектуал мулк ҳуқуқларига риоя этилганини назорат қилиш тартибини жорий этиш назарда тутилади.

Шунингдек, Бош прокуратура ва Олий судга интеллектуал мулк ҳуқуқларини бузганлик учун белгиланган жавобгарлик чораларини кучайтириш бўйича норматив-ҳуқуқий ҳужжат лойиҳасини ишлаб чиқиш вазифаси юклатилди.

Сентябрга қадар интеллектуал мулк ҳуқуқларини бузганлик учун белгиланган жавобгарлик чораларини янада кучайтириш, жумладан жиноий жавобгарликни жорий қилиш, саноат мулки ҳуқуқларини бузгани учун БҲМнинг 20 бараваридан 1000 бараваригача жарима пули ундириш механизми жорий қилинади.

Бундан ташқари, 2024 йил декабрга қадар интернетда, шу жумладан, ижтимоий тармоқларда интеллектуал мулкка бўлган ҳуқуқни ҳимоя қилишни янада такомиллаштириш бўйича норматив ҳуқуқий ҳужжат лойиҳаси ишлаб чиқилади.

Эслатиб ўтамиз, 2022 йилда қабул қилинган президент фармонига мувофиқ, саноат мулки объектлари тўғрисидаги қонунчиликни бузганлик учун жавобгарлик асослари белгиланган.

Тегишли патентланган саноат мулки объектини ўз ичига олган маҳсулотни ёки буюмни рухсатсиз тайёрлаш, қўллаш, импорт қилиш, сотишга таклиф этиш, сотиш, фуқаролик муомаласига бошқа йўсинда киритиш ёки шу мақсадда сақлаб туриш, шунингдек ихтиро патенти билан муҳофаза қилинаётган усулни қўллаш ёхуд ихтиро патенти билан муҳофаза қилинаётган усулда бевосита тайёрланган маҳсулотни фуқаролик муомаласига киритиш ёки шу мақсадда сақлаб туриш – юридик шахсларга БҲМнинг 100 бараваридан 200 бараваригача миқдорда жарима солишга сабаб бўлади.

Аввалроқ, 5та норматив ҳуқуқий ҳужжат ЖСТ талабларига мослаштирилгани маълум қилинганди. Ўзгаришларнинг катта қисми интеллектуал мулк соҳасига тааллуқли. Хусусан, Ўзбекистон фуқаролари ва норезидентлар учун патент божи тенглаштирилди.