Нархларни ошириш бўйича якуний қарор қабул қилинмаган — UzAuto Motors

Компания изоҳига кўра, бугун берилган баёнотдан асосий мақсад – дилерлар билан ҳамкорликнинг янги тизимига ўтилганини эълон қилиш бўлган. “Chevrolet.uz сайтида кўрсатилган нархлар 2024 йилнинг 4-чораги учун прогноз кўрсаткичлари асосида ҳисоблаб чиқилган. Нархларни ошириш бўйича якуний қарор қабул қилинмаган”, – дея маълум қилди UzAuto Motors.

Фото: Kun.uz

UzAuto Motors компанияси бироз аввал эълон қилган баёнотига қўшимча изоҳ билан чиқди.

“Компания хабаридаги асосий мақсад мижозларга хизмат кўрсатиш сифатини оширишни назарда тутувчи дилерлар билан ўзаро ҳамкорликнинг янги тизимига ўтганини эълон қилиш эди.

Ҳозирда контрактация жараёнлари олиб борилмаётганини инобатга олган ҳолда, Chevrolet.uz сайтида кўрсатилган нархлар 2024 йилнинг 4-чораги учун прогноз кўрсаткичлари асосида ҳисоблаб чиқилган.

Нархларни ошириш бўйича якуний қарор қабул қилинмаган”, – дейилади компания ахборотида.

Бундан аввалги расмий хабарда 2024 йилнинг иккинчи ярмида ишлаб чиқариладиган автомобиллар учун қўшимча контрактация очилиши ҳамда Damas, Labo ва Chevrolet Cobalt автомобилларининг нархи 3,5 – 6,7 фоизгача бўлган оралиқда қайта кўриб чиқилиши айтилганди.

Шунингдек, компания ўз дилерларига кейинчалик сотиш учун автомобилларни харид қилиш имкониятини беришини эълон қилди. Бунда, дилерларга автомобил учун тавсия этилган чакана қиймат белгиланади.

“Ушбу ёндашув нафақат дилерлик марказлари ўртасидаги рақобатни кучайтиради, балки хизмат кўрсатиш сифатини яхшилайди. Дилерлик марказлари хизмат кўрсатиш сифати ва инновацион хизматларни яхшилаш орқали қўшимча опциялар ва аксессуарларни таклиф қилиш имкониятига эга бўлишади”, – дея маълум қилди UzAuto Motors.