UzAuto Motors narxlarni oshirishini e’lon qildi

UzAuto Motors Damas, Labo va Cobalt avtomobillarini ishlab chiqarish hajmini qo‘shimcha ravishda oshirishini ma’lum qildi.

Kompaniya xabariga ko‘ra, ishlab chiqarishni ko‘paytirish bilan birga, 2023 yil oxirida berilgan shartnomalarning bir qismi uchun to‘lovlar o‘z vaqtida amalga oshirilmagani ham qo‘shimcha avtomobillarni sotuvga chiqarish imkonini bermoqda.

Damas, Labo va Cobalt uchun shartnomalar ochilish sanasi keyinroq e’lon qilinadi.

“Kontraktatsiya uchun ochiladigan qo‘shimcha hajm 2024 yilning ikkinchi yarmida ishlab chiqarilishi hisobga olgan holda, Damas, Labo va Chevrolet Cobalt avtomobillarining narxi 3,5 – 6,7 foizgacha bo‘lgan oraliqda qayta ko‘rib chiqiladi”, – deyiladi xabarda.

Ta’kidlanishicha, endilikda UzAuto Motors o‘z dilerlariga keyinchalik sotish uchun avtomobillarni xarid qilish imkoniyatini beradi. Shu bilan birga, dilerlarga avtomobil uchun tavsiya etilgan chakana qiymat belgilanadi.

“Ushbu yondashuv nafaqat dilerlik markazlari o‘rtasidagi raqobatni kuchaytiradi, balki xizmat ko‘rsatish sifatini yaxshilaydi. Dilerlik markazlari xizmat ko‘rsatish sifati va innovatsion xizmatlarni yaxshilash orqali qo‘shimcha opsiyalar va aksessuarlarni taklif qilish imkoniyatiga ega bo‘lishadi”, – deyiladi xabarda.

Ma’lumot uchun, “Raqobat to‘g‘risida”gi qonunning yangi tahririga ko‘ra, ustun mavqega ega kompaniyalar monopol tovarlarga nisbatan yangi narxlarni joriy etishda bu haqda kamida 15 kun oldin e’lon qilishi shart.

Avtomobillarning yangi narxlari quyidagicha ko‘rinish olishi kutilmoqda:

• Cobalt GS-Style Plus MT – 133 598 000 so‘m
  (avvalgi narx 124 264 000 so‘m edi);
• Cobalt GX-Style Plus AT – 156 589 000 so‘m
  (avvalgi narx 146 757 000 so‘m edi);
• Damas D2 DLX Style Plus – 100 325 000 so‘m
  (avvalgi narx 96 932 000 so‘m edi).

Eslatib o‘tamiz, UzAuto Motors 2023 yil davomida narxlarni ikki marta, oxirgisida oktyabr oyida oshirgan edi.