Венесуэладаги президентлик сайлови: мухолифатдан янги номзод маълум қилинди

Vente Venezuela мухолифат ҳаракати профессор Корина Йорисни Венесуэладаги президентлик сайловларига номзод сифатида кўрсатди. Ҳаракат раҳбари Мария Корина Мачадо бу ҳақда 23 март куни номзодларни рўйхатга олиш муддати тугашига бир неча кун қолганида маълум қилди. «У менинг тўлиқ ишончим ва қўллаб-қувватлашимга эга», деди Мачадо. 

Йорис сайловларда ғалаба қозонса, биринчи навбатда сиёсий маҳбусларни озод этишини айтган. Илгари мухолифат номзоди сифатида танланган Vente Venezuela етакчисига январ ойида Олий суд томонидан 15 йилга давлат лавозимларида ишлаш тақиқланган эди. Аксарият таниқли мухолифат сиёсатчилари суд қарори билан ўз номзодларини кўрсата олмаяпти. 

Мадуро мухолифат билан келишувларни бузганликда айбланмоқда 

Мачадо Венесуэла раҳбари Николас Мадурони Барбадос мухолифат келишувларини бузганликда айблади. Битимлар 2023 йилда тузилган ва халқаро кузатувчилар иштирокида эркин ва ошкора сайловларни ўтказишни назарда тутган. Келишувлар натижасида Қўшма Штатлар Каракасга қўйилган айрим санкцияларни вақтинча бекор қилди. 

Боливар республикасида президентлик сайловлари 28 июл куни бўлиб ўтиши кутилмоқда. Ҳукмрон Венесуэла Ягона социалистик партияси Мадурони ўз номзоди сифатида кўрсатган. Сиёсатчи 2013 йилдан буён Жанубий Америка давлатини бошқариб келади. Мухолифат 2018 йилги сайловларни бойкот қилди, шундан сўнг Мадуро ўзини давлат раҳбари деб эълон қилганди. 

Мадуронинг истеъфосини талаб қилган намойишлар 

2019 йил январ ойида ўша пайтда Венесуэла Миллий ассамблеяси (парламенти) раиси бўлиб ишлаган Хуан Гуайдо қасамёд келтириб, ўзини мамлакатнинг муваққат президенти деб эълон қилди. Уни Мадуронинг истеъфосини талаб қилиб, мамлакат кўчаларига чиққан ўн минглаб одамлар қўллаб-қувватлади. Германия, АҚШ ва 50 дан ортиқ бошқа давлатлар Гуайдони Жанубий Америка давлатининг вақтинчалик президенти сифатида тан олди. Россия Мадурони қўллаб-қувватлади.

2022 йил охирида Венесуэла парламенти Гуайдо ҳукуматини тарқатиб юбориш учун овоз берди. 2023 йил апрелида сиёсатчи Мадуро ҳукумати томонидан таъқиб қилиниш таҳдиди туфайли АҚШга кетишини эълон қилди.