Қашқадарёда эркак фарзандининг ўлимини айтган шифокорни урди

Қашқадарё вилояти, Шаҳрисабз шаҳрида фуқаро фарзанди вафот этганини айтган шифокорга мушт туширди. Бу ҳақда Millar кўрсатуви лавҳасида маълум қилинди.

Қайд қилинишича, 2 ёшли бола дивандан йиқилиб, Шаҳрисабз шаҳри болалар шифохонасига ётқизилган. Боланинг бош миясига қон қуйилгани сабабли реанимация бўлимига ўтказилиб, сунъий нафас аппаратига уланган. 17 апрел куни болада биологик ўлим кузатилган. Буни эшитган боланинг отаси эса шифокорга мушт туширган.

Калтакланган шифокор 47 ёшли жарроҳ экани таъкидланмоқда. Унга бош чаноғининг ёпиқ шикасти, бошмия чайқалиши, чап кўз қовоқлари юмшоқ тўқималарининг лат ейиши ташхиси қўйилган. У ҳозир даволанмоқда.

Калтакланган шифокор фарзандини йўқотган ота-онага ҳозир жуда қийин эканини, шу боис ҳолат бўйича ҳуқуқни муҳофаза қилиш органларига мурожаат қилмаганини айтган.

Шу сабабли текширув ҳаракатлари бошланмаган, аммо ҳолат Қашқадарё вилояти ИИБ назорати остида, дейилади лавҳада.