Эквадорда тўдалар зўравонлигига қарши кураш бўйича референдум ўтказилди

Эквадор фуқаролари уюшган жиноятчиликка қарши чораларни кучайтириш, армия ва полиция ваколатларини кенгайтириш ва қурол назоратини қатъийлаштиришга қарор қилди.

Фото: Global Look Press/IMAGO

Эквадорда тўдалар зўравонлигига қарши янада қатъийроқ чоралар кўриш бўйича референдум ўтказилди. 21 апрел, якшанба куни бўлиб ўтган оммавий овоз беришда армия ва полиция ваколатларини кенгайтириш, қурол назоратини кучайтириш ва уюшган гуруҳлар жиноятлари учун жазони қатъийлаштириш бўйича қарорлар қабул қилинди.

Шу билан бирга, уюшган жиноятчиликка алоқадорликда гумонланиб, хорижда қидирилаётган эквадорликларни экстрадиция қилишга рухсат берувчи конституцияга ўзгартириш киритиш бўйича овоз бериш бўлиб ўтмоқда. Жанубий Америка давлатида 13,6 миллионга яқин сайловчи референдумда қатнашиш ҳуқуқига эга.

Эквадор президенти Даниэл Нобоа мамлакатда кучайиб бораётган зўравонлик билан курашиб, режалаштирилган хавфсизлик чоралари учун сайловчиларнинг қўллаб-қувватлашига умид қилмоқда. У эквадорликларни полиция-ҳарбий патрул хизматини жорий этиш, қидирувдаги жиноятчиларни экстрадиция қилиш, терроризм ва қотиллик учун жазо муддатини узайтиришни қўллаб-қувватлашга чақирди. Референдумга жами 11 та масала қўйилди.

Эквадорда фавқулодда ҳолат

Январь ойида кучли «Лос Чонерос» тўдаси раҳбари, наркобарон Адолфо Маcиас қамоқдан қочиб кетганидан сўнг, Нобоа «ички қуролли можаро» туфайли фавқулодда ҳолат ва комендантлик соати эълон қилди. Ўша ойда юзига ниқоб тақиб олган шахслар жонли эфирда TC Televisión давлат телевидениесига бостириб кириб, бир неча журналист ва ходимларни гаровга олди.

Телеканалдаги воқеадан сўнг ва Эквадорда бандитизм кучайиши муносабати билан президент Нобоа барча тўдаларни йўқ қилишни буюрди. Фармон билан у қуролли кучларга «ички қуролли можаро» режимини эълон қилиб, йигирма жиноий ташкилотга қарши операциялар ўтказишни топширди. Фармонда Эквадорда фаолият юритаётган жиноий тўдалар йўқ қилиниши лозим бўлган террорчи ташкилотлар ва урушаётган нодавлат томонлар деб аталади. Бунга жавобан жиноий гуруҳлар ҳукуматга «уруш» эълон қилди. Ўшандан бери қамоқхоналарда зўравонлик авж олди, маҳбуслар тартибсизликлар уюштирди ва ходимларни гаровга олди. Бундан ташқари, Эквадорда қуролли ҳужумлар ва одам ўғирлашлар содир бўлди.

Даниэл Нобоа 2023 йил ноябр ойида лавозимга келганидан бери ўнга яқин сиёсатчи ва прокурорлар ўлдирилди. Президентнинг сўзларига кўра, унинг мамлакати «наркотеррорчилар ва уларнинг иттифоқчилари» томонидан террорга учрамоқда.

#референдум #Эквадор