Ямагата университети мутахассислари ўзбекистонлик тадбиркорларни ўқитади

12-18 апрел кунлари Япониянинг Ямагата университети делегацияси ҳамда Кичик бизнесни ривожлантириш жамғармаси ходимлари Қорақалпоғистон Республикаси, Хоразм ва Бухоро вилоятларида бўлиб, маҳаллий тадбиркорлар иштирокида ўқув семинари ўтказишди.

Шунингдек, “Кичик бизнесни узлуксиз қўллаб-қувватлаш” комплекс дастури иштирокчиси бўлган, ўқув курсларини тугатиб махсус сертификат асосида имтиёзли банк хизматларидан фойдаланаётган тадбиркорлар фаолияти билан бевосита корхоналарнинг ўзида танишув ташкил этилди.

Тадбиркорлик фаолиятини кўздан кечирган япон олимлари бизнесни тўғри ташкил этиш ва ривожлантириш юзасидан тавсиялар берди.

Шундан кейин Тошкентда, Ахборот ва оммавий коммуникациялар агентлигида бу ташриф якунларига бағишланган матбуот анжумани бўлиб ўтди. Унда Ямагата университетининг тадбиркорликка ўқитиш илмий-инновацион маркази директори, NЕC ва Lenovo компанияларининг собиқ вице-президенти профессор Тадаши Онодера лойиҳа ҳақида сўзлаб, вилоятларга ташрифдан олган таассуротлари билан ўртоқлашди.

Маълумот учун, Ўзбекистон президентининг 2023 йил 14 сентябрдаги “Кичик бизнесни ривожлантиришни молиявий ва институционал қўллаб-қувватлаш чора-тадбирлари тўғрисида”ги қарорида, “Кичик бизнесни узлуксиз қўллаб-қувватлаш” комплекс дастурини амалга ошириш ва уни доимий равишда такомиллаштириб бориш белгиланган.

Дастурга асосан, бизнес кўникмаларини шакллантириш йўналишидаги қисқа ва ўрта муддатли амалий ўқув курслари банк қошидаги Кичик бизнесни ривожлантириш жамғармаси томонидан ҳудудларда ташкил этилган 14 та Кичик бизнесга кўмаклашиш марказларида олиб борилади.

Президент ташаббуси билан тадбиркорларни ўқитиш жараёнига Япония тажрибасини татбиқ этиш ва бу борада Япония таълим муассасалари билан ҳамкорликни йўлга қўйишга эътибор қаратилмоқда.

Жорий йилнинг 7 март куни Токио шаҳрида бўлиб ўтган Ўзбекистон–Япония бизнес форуми давомида имзоланган шартнома ҳам айнан шу мақсадга қаратилган. Келишувга мувофиқ, 10 минг нафар ўзбек тадбиркори Япония тажрибаси асосида ўқитилади, бизнес кўникмаларини ривожлантириш, бизнес-режани ишлаб чиқиш, лойиҳаларни молиялаштириш манбаларини топиш каби йўналишларда ўқитилади.

Шунингдек, япониялик мутахассислар кўмагида маҳаллий кадрлар орасидан менторлар тайёрланади. Зеро келгусида Кичик бизнесни ривожлантириш жамғармаси томонидан тадбиркорларни ўқитиш ишлари маҳаллий менторлар ёрдамида ташкил этилиши режаланмоқда.

1949 йилда ташкил этилган Ямагата университети жаҳондаги энг яхши 600 та университет қаторига киради, 18 мамлакатдаги 48 та университет ва институтлар билан ҳамкорлик қилади, профессор олимлари АҚШнинг Кремний водийсидаги нуфузли компаниялар, Lenovo, Mitsui каби корпорацияларнинг бошқарув аъзолари ҳисобланади.

Шокир Шарипов,
Kun.uz мухбири