Россия думаси «чет эл агентлари»нинг сайловларда иштирок этишини тақиқлади

«Чет эл агентлари» энди Россия Федерациясидаги сайловларда номзод сифатида қатнаша олмайди. Давлат думаси тегишли тузатишларни иккинчи ва учинчи ўқишда маъқуллади.

Фото: duma.gov.ru

Россияда «чет эл агентлари» реестрига киритилган шахслар энди сайловларда қатнаша олмайди. Россия Давлат думаси 6 май, душанба куни «Сайлов ҳуқуқларининг асосий кафолатлари тўғрисида»ги қонунга «чет эл агентлари»нинг Россиядаги ҳар қандай сайловларда номзод сифатида иштирок этишини тақиқловчи тузатишларни иккинчи ва учинчи ўқишда қабул қилди. Ўзгартиришлар залда ҳозир бўлган деярли барча депутатлар томонидан (450 нафардан 409 нафари) бир овоздан қабул қилинди.

Ўзгартиришларга кўра, «чет эл агентлари» реестрига, шунингдек, экстремистик ёки террористик ташкилот фаолиятига алоқадор шахслар реестрига киритилган шахслар депутатликка номзод, сайловда кузатувчи, депутатликка номзодларнинг ишончли вакили бўла олмайди. Шу билан бирга, овоз бериш якунлари бўйича рўйхатга олинган номзодларни «чет эл агентлари» реестрига киритиш тақиқланади.

Тузатишлар қонун кучга кирганидан кейин 180 кун ўтиб «чет эл агентлари»нинг давлат органларидаги ваколатларини муддатидан олдин тугатишни назарда тутади.

Ҳокимият органларидаги «чет эл агентлари»

Ҳозирги вақтда Давлат думаси депутатлари орасида «чет эл агентлари» йўқ, лекин улар Москва шаҳар думаси депутатлари (Даря Беседина, Михаил Тимонов ва Евгений Ступин), Санкт-Петербург Қонунчилик ассамблеяси (Борис Вишневский), Коми Республикаси Қонунчилик ассамблеяси депутатлари (Виктор Воробёв), шунингдек, муниципал депутатлар орасида бор.

Тузатишлар ўтган ҳафта кутилмаганда қонун лойиҳасининг иккинчи ўқишига киритилган бўлиб, дастлаб Марказий сайлов комиссиясига ҳужжатларни хато билан юборган фуқароларнинг сайловда иштирок этишига йўл қўймаслик кўзда тутилган. Ўзгартиришлар «чет эл агентлари» томонидан сентябр ойида бўлиб ўтадиган Москва шаҳар думасига ўз номзодларини кўрсатиш бўйича кутилаётган кампания билан боғлиқ.

Ҳозирда «чет эл агентлари» рўйхатида 400 дан ортиқ шахс бор. Уларнинг аксарияти чет элда, аммо бир қисми Россияда қолмоқда. Россия расмийлари вакиллари бир неча бор шахс ёки ташкилотнинг «чет эл агентлари» рўйхатига киритилиши уларнинг ҳуқуқларини бузмаслигини, балки фақат чет элдан молиялаштириш устидан давлат назоратини назарда тутишини таъкидлаган. Шу билан бирга, қабул қилинган қонун лойиҳаси аслида уларни пассив овоз бериш ҳуқуқидан маҳрум этади.