Россиянинг энг яхши конкичиларидан бири Ўзбекистон шарафини ҳимоя қилади

Россиялик конкичи Данила Семериков «Матч ТВ» телеканалига берган интервюсида Ўзбекистон терма жамоасига ўтиш ниятида эканини айтди. 29 ёшли спортчининг сўзларига кўра, унга ўтган йили шу ҳақдаги таклиф тушган. 

«Спортдаги ягона мақсадим – мусобақаларни давом эттириш ва халқаро мусобақаларга қайтиш. Бу аниқ мақсад ва мен таклифга рози бўлиб, ушбу мамлакат терма жамоаси учун курашишга қарор қилдим», деди спортчи. 

Семериков - Жаҳон чемпионатининг 4 карра бронза медали (уч марта жамоавий пойгада ва бир марта 10 000 м масофада), Европа чемпионатининг уч карра совриндори (жамоа пойгасида иккита кумуш ва оммавий мусобақада бронза), Россиянинг кўп карра чемпиони ҳисобланади. 

Россиялик конкичилар ҳозир халқаро спорт мусобақаларидан четлатилган. 

2023 йилда россиялик конкичи, жаҳон чемпионатининг кўп карра совриндори Елизавета Голубева Қозоғистон фуқаролигини, Россия чемпиони Владимир Семирунний эса Полша фуқаролигини олган эди.