Бухоро вилоятининг кўп жойларида экин экиш учун ернинг шўрини ювиш керак, шунинг учун давлат кўпроқ саноатга эътибор беряпти, дея маълум қилди Шавкат Мирзиёев. “Мана шу заводни ҳам нима учун қурдик? Бундай қувурларни олиб келиш учун кўп пулимиз йўлга кетарди”, таъкидлади президент.
Президент Шавкат Мирзиёевнинг Бухоро вилоятига ташрифи арафасида “Қоракўл” эркин иқтисодий зонасида “Enpipe” корхонаси ишга туширилди.
Расмий релизга кўра, умумий қиймати 58 млн доллар бўлган лойиҳа тўлиқ хорижий инвестиция ҳисобидан амалга оширилган. Заводга Хитой, Туркия, Нидерландия ва Испаниядан замонавий ускуналар келтириб ўрнатилган, йилига 300 минг тонна металл қувурлар ишлаб чиқариш ташкил этилган.
“Тўғри чокли услубда тайёрланувчи бу қувурлар юқори босимга ва ташқи таъсирларга чидамлилиги билан ажралиб туради. Илгари бундай маҳсулотлар, асосан, хориждан олиб келинар эди. Ташишда қувурлар ҳажми кўп жой эгаллагани учун нархи ҳам қимматга айланарди.
Энди турли қалинликдаги металлар лист шаклида олиб келиниб, шу ерда тайёрланмоқда. Бунинг самарасида таннарх 25 фоиз арзонлашди.
Газ-кимё ва тоғ-кон саноати, қурилиш ва бошқа соҳаларда бундай чидамли қувурларга талаб юқори. Хусусан, шу ерда қурилаётган МТО газ-кимё мажмуасида ҳам шундан фойдаланилади.
Корхонада 400 дан ортиқ киши доимий иш билан таъминланди”, – дейилади президент матбуот хизмати хабарида.
Шавкат Мирзиёевга корхонанинг режалари, навбатдаги босқичлар ҳақида маълумот берилди.
Лойиҳанинг иккинчи босқичини амалга ошириш учун ишлар бошлаб юборилган. Унда босимга бардошли турли ҳажмдаги резервуарлар ишлаб чиқарилади. Яна 500 та янги иш ўрни яратилади.
Лойиҳа тўлиқ қувват билан ишласа, 121 миллион долларлик маҳсулотлар тайёрлаш имкони туғилади. Корхонанинг экспорт салоҳияти янада ортади.
Давлат раҳбари шу ерда оммавий ахборот воситалари вакиллари билан суҳбатлашди.
“Бугун Бухорога келишимиздан мақсад 2 миллиондан зиёд аҳолининг турмушини яхшилаш, даромад манбаи яратиш, камбағалликни қисқартириш. Вилоятнинг кўп жойида экин экиш учун ернинг шўрини ювиш керак. Шунинг учун биз кўпроқ саноатга эътибор бераяпмиз. Мана шу заводни ҳам нима учун қурдик? Бундай қувурларни олиб келиш учун кўп пулимиз йўлга кетарди. Бугун яна янги иншоотлар қурилишини бошлаймиз. Уларнинг атрофида бир нечта корхоналар, иш ўринлари пайдо бўлади. Пировард натижада одамларнинг уйига ёруғлик, ишонч ва умид киради. Ана шу умид бизларни бирлаштиради, – деди президент.
Маълумот учун, “Қоракўл” эркин иқтисодий зонаси президентнинг 2021 йил 13 августдаги қарорига асосан ташкил этилган. Умумий майдони – 566 гектар бўлиб, 5 та йирик лойиҳа жойлаштирилган. Улар босқичма-босқич амалга оширилиб, якунда уч мингга яқин иш ўрни яратилиши мўлжалланган.
