SpaceX собиқ ходимлари Маскни шилқимликда айблади

SpaceX’нинг саккиз нафар собиқ ходими компания ва унинг асосчиси, америкалик миллиардер Илон Маскни жинсий шилқимлик қилишда айблаб, судга берди, деб хабар тарқатди NBC News 12 июн, чоршанба куни кечқурун. Адвокатлар журналистларга даъво нусхасини тақдим этишди, у Лос-Анжелесдаги Калифорния штати судига юборилган. 

Шикоятчилар таъкидлашича, Маск SpaceX компаниясида жинсий шилқимлик ва Маскнинг жамоат жойларидаги хатти-ҳаракатлари «шармандалик манбаси» бўлганлиги ҳақида очиқ хат ёзганидан кейин уларни ишдан бўшатишга шахсан буйруқ берган. 

SpaceX собиқ ходимлари Маскни нимада айбламоқда? 

Илон Маск компанияни «қоронғу пайтларда» бошқаради, дейилади аризада. «У аёлларга жинсий объект сифатида қарайди, ходимларга беҳаё шаҳвоний ҳазиллар қилади ва бунга қарши чиққанларга, агар ёқмаса, бошқа жойда иш қидириши мумкинлиги айтади», деди аёллар. 

Даъвода федерал ва штат меҳнат қонунлари бир неча бор бузилганлиги, шу жумладан Маскнинг «шахсан жинсий шилқимлик билан шуғуллангани ва ёмон иш муҳитини яратганлиги», ходимлардан «камситиш, таъқиб қилиш ва ёмон иш муҳитига қарши чиққанлик учун» ўч олгани айтилади, дейилади NBC News хабарида.

«Даъвога кўра, Маскнинг Twitter, ҳозир эса X ижтимоий тармоғидаги постлари оддий ходимлар ўртасида иш жойида жинсий жиҳатдан номақбул нутқ ва хатти-ҳаракатларни рағбатлантирган. Даъвода унинг (Илон Маск) камида 20 та пости эслатиб ўтилган», - дея таъкидлайди нашр. 

SpaceX президентининг изоҳи

11 июн куни The Wall Street Journal интернет-нашри ҳам SpaceX собиқ ходимларининг худди шундай айбловлари ҳақида ёзди. SpaceX президенти ва бош операцион директори Гвинн Шотвелл нашрга берган изоҳларида матбуот хабарлари «чалғитувчи экани»ни билдирган ҳамда Илон Маск «у таниган энг яхши одамлардан бири» эканлигини айтган. SpaceX жинсий зўравонлик ҳақидаги барча айбловлар бўйича тўлиқ текширув ўтказмоқда ва тегишли чоралар кўрмоқда, дея қўшимча қилди у. 

Саккизта ишдан бўшатиш ҳолати январ ойида SpaceX’га қарши Миллий меҳнат муносабатлари кенгаши (NLRB) минтақавий вакили томонидан компанияни федерал меҳнат қонунларини бузганликда айблаган шикоят мавзуси бўлган, деб эслатади NBC News. Ўшанда SpaceX NLRB тузилмасини конституцияга зид деб эълон қилишни талаб этиб, қарши даъво билан чиқди. NLRB шикояти ва тегишли даъво ҳали ҳам кўриб чиқилмоқда, дейилади нашрда. 

Бироқ, 12 июн куни оммага эълон қилинган даъво ушбу шикоятдан фарқ қилади, чунки у SpaceX иш жойидаги ёмон муҳит ва ишдан бўшатишлар учун жавобгарликка тортилиши сўралаётган Илон Маскка қаратилган.