Италияда «Олтин тўп» совриндори Роберто Баджо уйига қароқчилар бостириб кирди 

Италия миллий жамоасининг собиқ футболчиси, «Олтин тўп» совриндори Роберто Баджо уйида оиласи билан Европа чемпионати ўйинини томоша қилаётганида, беш кишидан иборат қуролли гуруҳ бостириб кирган. Бу ҳақда Corriere del Veneto газетаси ёзди. 

Ҳужум 20 июн оқшомида, Италия — Испания ўйини вақтида содир бўлган. Қароқчилар уйга кириши билан Баджо улардан бирини тўхтатмоқчи бўлган, бироқ жиноятчи унинг бошига тўппонча билан урган. Шундан сўнг Баджо ва унинг оиласи хоналардан бирига қамаб қўйилган. 

Қароқчилар уйдан қимматбаҳо соатлар, тақинчоқлар ва пулларни олиб кетишган. Баджо ҳужумчилар уйдан чиқиб кетганидан сўнг, эшикни бузиб, полицияни чақирган. 

Баджо маҳаллий шифохонага ётқизилган ва унинг пешонасига бир нечта чок қўйилган. Оиланинг қолган аъзолари жабрланмаган. Уйда Баджо, унинг рафиқаси ва уч нафар фарзанди бўлган.

Полиция ҳодиса юзасидан тергов бошлаган. 

Роберто Баджо фаолияти давомида кўплаб клубларда ўйнаган, жумладан, «Фиорентина», «Ювентус» ва «Милан». 1993 йилда у «Олтин тўп»ни қўлга киритди. Баджо икки карра Италия чемпиони, УЕФА кубоги ва Италия кубоги соҳиби. У Италия миллий жамоаси сафида 56 та ўйин ўтказиб, 27 та гол урган. Миллий жамоа аъзоси сифатида 1990 йилги жаҳон чемпионатида бронза, 1994 йилги жаҳон чемпионатида кумуш медални қўлга киритган эди.