Ўзбекистон элчиси Канада генерал-губернаторига ишонч ёрлиқларини топширди

Ўзбекистоннинг Канададаги элчиси (қароргоҳи Вашингтон шаҳрида) Фурқат Сиддиқов Канада генерал-губернатори Мэри Симонга ишонч ёрлиқларини топширди.

Фото: Дунё

"Дунё" хабарига кўра, тантанали маросимдан сўнг бўлиб ўтган учрашувда Канада генерал-губернатори Ўзбекистонда амалга оширилаётган ислоҳотлар, Марказий Осиёда яхши қўшничилик, миллатлараро тотувлик ва бағрикенгликни таъминлаш борасида эришилаётган ютуқлардан яхши хабардор эканини таъкидлади.

Ўзбекистон ва Канада иқтисодиёти ўзаро манфаатли ҳамкорликни янада кенгайтириш учун катта салоҳиятга эга экани билдирилди. Шу нуқтайи назардан, доимий равишда ўзаро иқтисодий ташрифлар ва савдо миссиялари алмашинувини йўлга қўйиш таклиф этилди.

Фурқат Сиддиқов 2023 йилнинг май ойида Ўзбекистоннинг АҚШдаги элчиси сифатида президент Жо Байденга ишонч ёрлиқларини топширган эди. Шунингдек, у октябр ойида Ўзбекистоннинг Бразилиядаги элчиси (қароргоҳи Вашингтонда) этиб тайинлангани тўғрисидаги ишонч ёрлиғи нусхасини топширган. Шу тариқа, Ўзбекистоннинг АҚШдаги элчиси Бразилия ва Канадада ҳам мамлакат расмий вакили ҳисобланади.

Аввал Ўзбекистон ташқи ишлар вазирининг биринчи ўринбосари лавозимида ишлаган Фурқат Сиддиқов 53 ёшда. У 1993 йилда Тошкент давлат техника университетини тамомлаган. Меҳнат фаолияти давомида "ЎзДэуЭлектроникс" ҚК, Ўзбекистон президенти ҳузуридаги Стратегик ва минтақалараро тадқиқотлар институтида ишлаган. 2002 йилдан бери ТИВ тизимида турли лавозимларда фаолият кўрсатиб келмоқда. Хусусан, Ўзбекистоннинг АҚШдаги элчихонасида, Покистондаги элчи, вазирнинг ўринбосари ва биринчи ўринбосари лавозимларида ишлаган.

Фурқат Сиддиқов 2017-2023 йилларда Ўзбекистоннинг АҚШ, шунингдек, ўриндошлик асосида Канада ва Бразилиядаги элчиси бўлиб ишлаган Жавлон Ваҳобов ўрнига тайинланган.

#Канада #Фурқат Сиддиқов