Франциядаги парламент сайловларида ултраўнглар ғалаба қозонишди

Парламент сайловларининг биринчи турида ултраўнгчиларнинг «Миллий уюшма» партияси 34,2 фоиз тўплаб биринчи ўринни эгаллаган, деб хабар беради республика ички ишлар вазирлиги.

Иккинчи ўринда сўл партиялар колицияси «Янги халқ фронти». Унга Жан Люк Меланшоннинг «Енгилмас Франция» (LFI), Социалистик партия (PS), «Европа экологлар ва яшиллар» (EEVL), Коммунистик партия (PCF) ва радикал антикапиталистик партия бирлашган. Улар 29,1 фоиз овоз тўплаган.

Эммануэл Макроннинг «Ренессанс» (Renaissance), Франсуа Байрунинг марказчиларидан иборат «Демократик ҳаракат» (Modem) ва саобиқ бош вазир Эруард Филиппнинг «Ҳоризонтлар» (Horizons) партияларидан иборат «Республика учун биргаликда» блоки 21,5 фоиз тўплаган.

Шундай қилиб, биринчи турнинг дастлабки якунларига кўра, «Миллий убшма» парламентдаги 577 та ўриндан 240–270 ўринни эгаллайди ва бу партияга нисбий кўпчиликни тақдим этади. «Янги халқ фронти» сўл кучлар блоки 180–200 депутат ўрнидан умид қилса бўлади. Макроннинг коалицияси эса 160 та ўрнидан ажралган ва 60 тадан 90 тагача жойга эгалик қилиши мумкин.

Натижалар эълон қилингач, «Миллий уюшма»нинг собиқ раҳбари Марин Ле Пен президент тарафдорлари устидан ғалаба қозонилганини эълон қилиб, сайловларнинг иккинчи турида ҳам ўзларига овоз беришга чақирди. Сиёсий ҳаракат етакчиси Жордан Барделла ўзларининг партиясини қўллаб-қувватлаган французлар қаттиқ ўзгаришлар хоҳлашаётганини таъкидлади. У бош вазир бўлишни истаётгани ва «Миллий уюшма»га парламентда мутлақ кўпчиликка эга бўлиш имкониятини тақдим этишни сўради.

«Миллий фронт» етакчиси Меланшоннинг айтишича, Франциянинг ҳозирги ҳукумати раҳбари Габриэл Аттал сайловлардан сўнг ўз лавозимини сақлаб қола олмайди.

Эслатиб ўтамиз, 9 июн куни Европарламентга ўтган сайловларда «Миллий уюшма» партияси президент Эммануэл Макрон тарафдорлари коалициясидан икки баробар кўпроқ овоз тўплаб, ғалаба қозонган эди. Макрон шундан сўнг парламентни тарқатиб юбориб, муддатидан аввал янги сайловлар белгилаганди.

Французлар 30 июн ва 7 июл кунлари икки турда парламентда уларнинг манфаатларини кўзловчи 577 депутат учун овоз беришлари керак бўлади.

Бешинчи республика тарихида илк марта сайловлар бу қадар қисқа муддатларда ўтказилмоқда. Парламент тарқатилгач, партиялар бор-йўғи уч ҳафта ичида номзодларини илгари суриб, сайловолди ташвиқотини ўтказишга мажбур бўлишган.

Шуниси эътиборлики, сайловларда давомат 69 фоизни ташкил этган ва Франция учун бу рекорд кўрсаткич ҳисобланади.