Францияда сайлов: Ле Пеннинг партияси ютқазди

Францияда парламент сайловларининг иккинчи тури бўлиб ўтди. Экзитт-полл натижаларига кўра, биринчи турда ғолиб бўлган Марин Ле Пеннинг «Миллий бирдамлик» партияси иккинчи турда муваффақиятсизликка учради ва учинчи ўрин билан кифояланди.

Биринчи ўринни сўлчилар ва яшиллар алянси, иккинчи ўринни президент Макроннинг «Биргаликда» блоки эгаллади.

BFMTV телеканали келтирган экзитт-полл натижаларига кўра, Ле Пеннинг партияси парламентда 115 тадан 150 тагача ўрин оладиган бўлди. Иккинчи ўриндаги алянсга 175 тадан 205 тагача ўрин тегади. Макрон етакчилигидаги блок 150 тадан 175 тагача ўринга эгалик қилади.

Шу тариқа ҳеч бир партия парламентда мутлақ кўпчилик ўрин ололмади. Иккинчи турда парламентдаги 577 ўрин тақсимланди. Биринчи турда 76 ўрин учун сайлов ўтказилган ва уларнинг 39 тасини Ле Пен партияси депутатлари ютиб олганди. «Миллий фронт»га 32 та, Макроннинг коалициясига атиги 2 та ўрин текканди.

Иккинчи турда давомат фавқулодда юқори бўлди. Француз нашрларига кўра, сайлов иккинчи турида 67,1 фоиз сайловчи қатнашган ва бу охирги 44 йилдаги энг юқори давомат бўлган.

Маълумот учун, Францияда муддатидан олдин парламент сайловлари президент Макрон томонидан тайинланганди. Макрон Европарламент сайловларида Ле Пен партиясидаги ўнгчилар ғолиб бўлганидан кейин шундай қарор қабул қилганди.

Марин Ле Пен партияси парламентда кўпчиликка эга бўлолмади, аммо энди амалдаги президент Эммануэл Макронда ҳам бундай имконият бўлмайди. Макрон эндиликда қайсидир томон билан келишиб ишлашига тўғри келади.

Сайлов натижалари фонида Франция бош вазири Габриэл Аттал истеъфога чиқишини маълум қилди.