1 августдан автомобил давлат рақамларини бериш тартиби ўзгаради

Ҳукумат қарори билан давлат рақамларини тасодифий танлаш йўли орқали бериш тартиби жорий қилинади. 1 декабрдан бошлаб автомобилларни рўйхатдан ўтказиш ва рақам бериш бўйича мурожаатларни онлайн юбориш имконияти яратилади.

Фото: Kun.uz

1 августдан бошлаб автомобилларга давлат рақами белгилари тасодифий танлаш йўли билан берилади. Бу ҳақда «Ўзбекистон Республикаси ҳукуматининг айрим қарорларига автомобил йўлларида ҳаракат хавфсизлигини таъминлашга қаратилган ўзгартириш ва қўшимчалар киритиш тўғрисида»ги 17 июл куни қабул қилинган қарорида сўз боради.

Ҳозирги тартиб бўйича давлат рақами белгилари ўсиб борувчи рақамлаш кетма-кетлиги бўйича берилмоқда («чиройли рақамлар» бундан мустасно, улар аукцион орқали сотилади).

Янги тартибга кўра, давлат рақамлари Ички ишлар вазирлиги Йўл ҳаракати хавфсизлиги хизматининг Ягона автоматлаштирилган ахборот тизимининг «Давлат рақам белгилари» модули орқали автоматик тарзда шакллантирилади.

Қарорга кўра, 1 декабрдан ЙҲХБ мобил иловаси, хизматнинг расмий сайти, Call-маркази ёки Ягона интерактив давлат хизматлари портали (my.gov.uz) орқали автомобилларни рўйхатдан ўтказиш ва рақам бериш бўйича мурожаатларни юбориш ва тўловни амалга ошириш мумкин бўлади.

#давлат хизматлари #йўл ҳаракати қоидалари #Давлат рақами