Ўзбекистонда янги зирҳли ҳарбий машина ишлаб чиқилди

Ўзбекистон Мудофаа саноати агентлиги янги «Арслон» зирҳли ҳарбий машинасини синовга жўнатди. Техника НАТО стандартлари асосида ишлаб чиқилган, деб хабар берди «Ўзбекистон 24».

Қайд қилинишича, тўрт ўқли машина саккиз десантчи ва уч кишидан иборат экипажни ўз ичига сиғдира олади. «Арслон»нинг олд қисми зирҳи 30 мм калибрли зирҳ тешувчи снарядлардан ҳимоя қилади, ён зирҳи эса 14,5 мм калибрли ўқларга чидамлидир. Машина, шунингдек, экипаж ва қўшинларни таг қисми ёки ғилдирак остидаги 10 килограмм портловчи модданинг портлашидан ҳимоя қилиши мумкин.

Зирҳли транспорт воситаси 30 мм автоматик тўп ва пулемёт билан жиҳозланган. Машина куннинг исталган вақтида нишонларни ўққа тутишга қодир. Конфигурацияга қараб, «Арслон»нинг вазни 30-35 тоннани ташкил қилади.

Зирҳли транспортни ишлаб чиқарган компания вакили Акмал Каримовнинг таъкидлашича, уни ишлаб чиқишда НАТО стандартларига таянилган, чунки у «энг юқори ва энг қатъий талаблар»дир.