Rheinmetall Украинада снарядлар ишлаб чиқариш учун буюртма олди

Германия мудофаа концерни Украинада ўқ-дорилар ишлаб чиқарувчи завод қуради. 24 ойдан кечиктирмай, йилига минглаб артиллерия ўқларини ишлаб чиқариш режалаштирилган.

Фото: Sepp spiegl/IMAGO

Германиянинг Rheinmetall мудофаа концерни Украина ҳукуматидан ушбу мамлакатда ўқ-дорилар ишлаб чиқарувчи завод қуриш бўйича буюртма олди. Бу ҳақда 24 июл, чоршанба куни Дюсселдорфдаги Европанинг энг йирик ўқ-дори ишлаб чиқарувчи корхонаси маълум қилди.

Йилига минглаб ўқ-дорилар

Ишлаб чиқариш учун зарур бўлган машина ва ускуналар яқин вақт ичида етказиб берилади, дейилади хабарда. Заводни қуришнинг аниқ қиймати ошкор этилмаган, бироқ буюртма ҳажми бир неча юз миллион еврони ташкил этиши кўрсатилган. Ишлаб чиқариш 24 ой ичида бошланиши режалаштирилган.

Яқин келажакда ташкил этиладиган «Украина ўқ-дорилар бўйича илғор тажриба маркази» (Ukrainian Competence Center for Ammunition) деб номланган қўшма корхона йилига минглаб, асосан, 155 мм калибрли артиллерия ўқларини ишлаб чиқариши керак.

Ҳамкорлар Украинада қуриладиган ишлаб чиқариш заводини биргаликда ишлатишни режалаштирмоқда. Шу билан бирга, Rheinmetall қўшма корхона акцияларининг 51 фоизига, украиналиклар эса 49 фоизга эгалик қилади.

Украинада Rheinmetall заводини қуриш қарори февралда эълон қилинган

«Биз ва ҳамкоримиз ўқ-дорилар бўйича Украина марказини яратмоқдамиз», деди Rheinmetall бош директори Армин Паппергер. Феврал ойи ўрталарида Мюнхен хавфсизлик конференцияси доирасида Rheinmetall ва Украина ўртасида қўшма корхона яратиш бўйича ўзаро англашув меморандуми имзоланган эди.

2023 йил октябр ойида Rheinmetall транспортларга техник хизмат кўрсатиш ва таъмирлаш билан шуғулланадиган Украинанинг «Укроборонпром» давлат концерни билан биринчи қўшма корхонасини ташкил этди.