Швейцарияда Суданда тинчлик ўрнатиш бўйича музокаралар бошланди

Швейцарияда 14 август, чоршанба куни Суданда ўт очишни тўхтатиш бўйича музокаралар бошланди. Икки қарама-қарши томондан Судан армияси эмас, фақат Тезкор ҳаракат кучлари (RSF) вакиллари иштирок этмоқда, деб ёзади AFP Америка элчихонаси дипломатига таяниб. Музокаралар АҚШ шафелигида олиб борилмоқда.

АҚШнинг Судан бўйича махсус вакили Том Перриелло айтишича, учрашув иштирокчилари 2023 йилда Саудия Арабистони Жидда шаҳрида тузилган шартномалар бўйича томонлар ўз мажбуриятларини бажаришга эътибор қаратган. «Уришаётган томонлар халқаро гуманитар ҳуқуқни ҳурмат қилиши ва инсонпарварлик ёрдами етказиб берилишини таъминлаши керак. Қуролларни бир четга олиб қўйиш вақти келди!» - деб ёзди дипломат X ижтимоий тармоғида. 

Хавфсизлик нуқтайи назаридан музокаралар қаерда бўлиб ўтиши аниқ маълум қилинмаган. Улар максимал ўн кун давом этиши кутилмоқда. Учрашувда Саудия Арабистони ва Швейцария вакиллари ҳам иштирок этмоқда. Музокараларда Африка Иттифоқи, Миср, Бирлашган Араб Амирликлари ва БМТ вакиллари кузатувчи сифатида қатнашади.

Судандаги можаронинг кучайиши

2023 йил апрел ойи ўрталарида мамлакатнинг амалдаги президенти бўлган Абдел Фаттоҳ ал-Бурхон бошчилигидаги Судан мунтазам армияси (SAF) ва Муҳаммад Ҳамдан Дагало қўмондонлигидаги Тезкор ҳаракат кучлари ўртасида жанглар бошланди. Ҳеч бир томон ҳалигача устунликка эриша олмади ва ҳокимиятни тўлиқ қўлга кирита олмади. Вақти-вақти билан томонлар ўт очишни тўхтатиш бўйича келишувга эришяпти.

Сўнгги кунларда ал-Бурхон музокараларда қатнашмаслигини бир неча бор таъкидлаган. У RSF’дан биринчи навбатда босиб олинган шаҳарлардан қўшинларини олиб чиқиб кетишни талаб қилди, деб хабар берди Sudan Tribune.

БМТ маълумотларига кўра, жангларда ўн минглаб одамлар ҳалок бўлган. 10,7 миллиондан ортиқ одам ўз уйини ташлаб кетган, 2,3 миллион киши эса мамлакатни тарк этган. Июн ойида Бирлашган Миллатлар Ташкилоти мамлакатнинг 26 миллионга яқин аҳолиси учун ҳақиқий очарчилик хавфи борлигини айтди.