Самарқандда маст ҳайдовчи икки кишининг умрига зомин бўлди

Ҳодиса Каттақўрғон туманидаги маҳаллалардан бирида, ички йўлда содир бўлган.

Фото: Видеодан кадр

Самарқанд вилояти Каттақўрғон туманида ҳайдовчи маст қилувчи ичимлик таъсирида машина бошқариб икки кишининг ўлимига сабабчи бўлган. Бу ҳақда “Марказий студия” информацион дастурида хабар берилган.

Маълум бўлишича, 2024 йил 17 август куни маст қилувчи ичимлик истеъмол қилиб Ласетти машинасини бошқарган ҳайдовчи Каттақўрғон туманидаги ички йўллардан бирида бошқарувни йўқотган.

Сўнг машина фуқаролардан бирига тегишли уйнинг дарвозасига зарб билан урилган. Оқибатда машинада йўловчи сифатида кетаётган икки нафар кекса ёшдаги фуқаро оғир тан жароҳатлари олиб воқеа жойида ҳалок бўлган. Яна икки киши тан жароҳатлари олган.

Қайд этилишича, ҳодиса юзасидан Жиноят кодексининг 266-моддаси 2-қисми билан жиноят иши қўзғатилган. Ҳозирда тергов ҳаракатлари олиб борилмоқда.