“Шарқ тароналари” фестивали доирасида илмий анжуман ўтказилади

27-28 август кунлари Юнус Ражабий номидаги Ўзбек Миллий мусиқа санъати институтида “Шарқ халқлари мусиқа маданияти: глобаллашув жараёнларида ижодий уйғунлашув тамойиллари” мавзусида халқаро илмий-амалий конференция ўтказилади.

“Шарқ тароналари” XIII халқаро мусиқа фестивали доирасида ташкил қилинаётган мазкур анжуманда 32 хорижий давлатдан 46 нафар мусиқашунос, фолклоршунос ва маданиятшунос олимлар, шунингдек, нуфузли олий таълим муассасалари ректорлари ва илмий-ижодий марказлар раҳбарлари қатнашади.

Анжуманда илмий янгилик сифатида таснифланаётган “Мақом капсуласи” тақдимоти бўлиб ўтади. Шунингдек, мақомнинг ижро вақти ҳамда унинг инсон руҳиятига ижобий таъсири тўғрисидаги маълумотлар жамланган “Қўллаш бўйича йўриқнома” ҳам тақдим этилади.

Конференция мобайнида ТУРКСОЙ қошидаги “Туркий давлатлар санъат университетлари иттифоқи” резолюцияси қабул қилиниши ва турли давлатлар олий таълим муассасалари ўртасида ҳамкорлик меморандумлари, Хитой, Франция, Россия, Германия, Гамбия, Уммон ва Иордания давлатларидаги олий ўқув юртлари, халқаро илмий тадқиқот марказлари билан жами 12 та ўзаро ҳамкорлик шартномалари имзоланиши режалаштирилган.

Ушбу ҳамкорликлар қўшма ижодий лойиҳалар, халқаро фестиваллар ва дарслар ўтказиш, илмий тадқиқотлар ва назарий маърузалар ўқиш каби соҳаларни қамраб олади.

Сессияларда миллий мусиқа санъатини туркий давлатлар мусиқа маданияти билан уйғунлаштириш, инновацион таълим технологияларини кенг жорий этиш каби масалаларнинг ҳам муҳокама қилиниши таъкидланган.