Ҳукумат қарори билан “Андижон вилояти Бобур шаҳрида рассомлар фестивалини ташкил этиш ва ўтказиш тартиби тўғрисида”ги низом тасдиқланди.
Низомга кўра, Фестиваль 2026 йилдан ҳар 2 йилда 1 маротаба, қоида тариқасида, май ойида ўтказилади.
Фестивалда иштирок этишни истаган номзодлар 1 февралгача ташкилотчиларга қуйидагиларни топширади:
- маълумотнома (резюме);
- 3 дона 6x9 ўлчамдаги рангли фотосурат;
- тасвирий санъат соҳасида етарли тажрибага эга эканлиги, ўз давлатида ёки бошқа чет элда ўтказилган соҳага оид фестиваллар ва кўргазмаларда иштирок этганлиги тўғрисида гувоҳнома, диплом, сертификат нусхалари;
- номзоднинг ўзи ижод қилган тасвирий санъат йўналишидаги ижодий асарларининг 10 донадан кам бўлмаган сифатли фотосуратлари ва уларни яратиш жараёнлари акс эттирилган видеодиск.
Ташкилий қўмита 1 апрелгача фестивалда иштирок этувчиларнинг рўйхатини аниқлайди.
Фестиваль қуйидаги номинациялар бўйича ўтказилади:
- “Гран-при”;
- “Энг яхши рангтасвирчи рассом”;
- “Энг яхши ҳайкалтарош”;
- “Энг яхши фоторассом”;
- “Энг яхши график рассом”.
Фестивал ғолиблари президент совғаси сифатида енгил автомобил (Chevrolet Onix ёки шу классдаги бошқа автомобил), диплом, рамзий ҳайкалча ва пул мукофотлари билан тақдирланади.
