Писториус: Халқаро ҳуқуқ Россия ичкарисига зарба йўллашга рухсат беради

Германия мудофаа вазири Борис Писториус фикрича, НАТО ҳамкорларининг Украинага Россиядаги нишонларга қарши узоқ масофага учувчи қуроллардан фойдаланиш бўйича берадиган рухсати халқаро ҳуқуққа тўғри келади. Бу ҳақда у 13 сентябр, жума куни Берлинда ўзининг литвалик ҳамкасби Лауринас Кашчюнас билан учрашувда маълум қилди, дея хабар беради AFP. «Халқаро қонунлар бунга имкон беради», деди Писториус ҳамда АҚШ ва Британия Киевга етказиб берган қурол-яроғлар борасида «шундай қарор қабул қилишда» эркин эканига аниқлик киритди.

Россия президенти Владимир Путиннинг бундай қадам НАТОнинг урушга киришини англатиши ҳақидаги таҳдидлари ҳақида Писториус шундай деди: «Путиннинг таҳдидлари - бу Путиннинг таҳдиди. Айтиш керак бўлган нарса шу. У хоҳлаганида таҳдид қилади ва ўзига жалб қилади». Германия Мудофаа вазирлиги раҳбари қўшимча қилишича, Путин сўнгги йилларда Ғарб давлатларининг Украинани қўллаб-қувватлашига йўл қўймаслик учун бир неча бор таҳдид қилган, бироқ бу Украинани ҳудудларни қайтариш учун зарур бўлган барча нарсалар билан таъминлашга таъсир қилмаслиги керак, деб Писториус сўзларидан иқтибос келтирган AFP.

Германия ва Литва Бундесвер бригадасини жойлаштириш бўйича шартнома имзолади

Писториус ва Кашчюнас Берлинда немис бригадасини Литвада доимий жойлаштириш бўйича шартнома имзолади. Аввал хабар қилинганидек, Германия ҳукумати Россия Федерациясининг Украинага қарши кенг кўламли уруши фонида НАТО шарқий қанотини мустаҳкамлаш ва Литвада 5000 кишидан иборат Бундесвер бригадасини доимий равишда жойлаштиришга қарор қилди.

Вазирлар йиғилишда бригаданинг «дастлабки кучлари» келаси йили «вақтинчалик» жойлаштирилишини келишиб олдилар. Булар штаб ва ёрдамчи рота, алоқа ротаси ҳамда логистика ва тиббий ёрдам бўлимининг қисмлари бўлади, дея аниқлик киритади AFP агентлиги.

Британия бош вазири: Биз Россия билан зиддиятга интилмаяпмиз

Британия ҳукумати раҳбари Кир Стармер кеча унинг мамлакати Россия билан «зиддиятга интилмаётганини» айтди. Шундай қилиб, у Россия президенти Владимир Путиннинг Украинанинг Ғарб узоқ масофали ракеталарини Россия ҳудудидаги нишонларга зарба бериш учун қўллаши НАТО давлатларининг урушида «тўғридан тўғри иштирок этишини» англатиши ҳақидаги баёнотини рад этди. 

Стармернинг сўзлари унинг Қўшма Штатларга ташрифи олдидан янграган. 13 сентябр куни у Вашингтонда президент Жо Байден билан учрашади. Уларнинг музокаралари мавзуларидан бири Украинанинг Россия Федерациясига чуқур зарба бериш учун Ғарб ракеталаридан фойдаланиш имконияти бўлиши кутилмоқда.

Лондон Украинага Россияга Storm Shadow ракеталари билан зарба йўллашга рухсат берди

Британия Украинага Россия ҳудудига ҳужум учун Storm Shadow қанотли ракеталаридан фойдаланишга рухсат беришга қарор қилди, деб хабар берди The Guardian газетаси 11 сентябр, чоршанба куни кечқурун Британия ҳукуматидаги манбаларига таяниб. Бу ҳақда нашр АҚШ давлат котиби Энтони Блинкен ва Британия ташқи ишлар вазири Дэвид Лэммининг 11 сентябр куни Киевга қўшма ташрифига бағишланган мақоласида айтиб ўтган. Сафар чоғида улар Украина президенти Володимир Зеленский билан учрашиб, Ғарб узоқ масофага мўлжалланган қуролларининг Россия ҳудудига зарбаларини муҳокама қилишган. 

Газета манбаларининг таъкидлашича, Блинкен ва Лэмми Киевга Storm Shadow бўйича ижобий қарор қабул қилингани учун бирга келган. Шу билан бирга, The Guardian қайд этишича, агар Лэмми қарорни Киевда эълон қилганида эди, унинг сўзлари кераксиз провокация сифатида қабул қилиниши мумкин эди.

Нашрнинг қўшимча қилишича, Украинанинг ракеталардан фойдаланиши «кераксиз ҳужумлар олдини олиш учун» чекловларга дучор бўлиши мумкин. Блинкен Киевга ташрифи чоғида Қўшма Штатлар биринчи кунданоқ Украинадаги жанг майдонидаги вазият ўзгарганлиги сабабли ўз сиёсатини мослаштиришга тайёр бўлганини айтди. «Биз буни давом эттирамиз», деди у. 

Путин: Ғарб қуроллари билан зарбалар НАТОнинг Украина урушидаги иштироки бўлади

Украина қуролли кучларининг Россия ҳудудига ҳужумлари учун Ғарбнинг юқори аниқликдаги узоқ масофали қуролларидан фойдаланиш НАТО давлатларининг Украинадаги урушда бевосита иштирок этишини англатади, деди Владимир Путин кеча «Россия 1» телеканалига берган интервюсида.

Унинг сўзларига кўра, Киев бундай зарбаларни ўзи амалга ошира олмайди, чунки бунинг учун унга сунъий йўлдошлардан олинган маълумотлар керак бўлади, у эса Украинада йўқ. Бундан ташқари, Путин «фақат НАТО ҳарбий хизматчилари ушбу ракета тизимларига парвоз вазифаларини белгилаши мумкин», дея қўшимча қилди.

«Гап Украина режимига Россияга ушбу қуроллар билан зарба йўллашга рухсат бериш ёки бермаслик ҳақида эмас. Гап НАТО давлатлари ҳарбий можарода бевосита иштирок этадими ёки йўқми деган қарорга келиш ҳақида. Агар бу қарор қабул қилинса, бу Украинадаги урушда НАТО давлатлари, АҚШ ва Европа давлатларининг бевосита иштирокидан бошқа ҳеч нарсани англатмайди», — деди Россия президенти. Тегишли қарор қабул қилинган тақдирда, «бу можаронинг моҳияти ўзгаради ва Россия биз учун яратиладиган таҳдидлардан келиб чиқиб, тегишли қарорлар қабул қилади», дея аниқлик киритди у.