Зеленский БМТда: Россияни тинчликка фақат мажбурлаш мумкин

Россиянинг Украинага давом этаётган кенг миқёсли босқинини «гап билан тинчлантириш мумкин эмас» — бунинг ўрнига чора кўриш керак, чунки уруш шунчаки «тўхтамайди». Бу ҳақда 24 сентябр, сешанба куни Ню-Йоркда БМТ Хавфсизлик кенгаши йиғилишида сўзлаган Украина президенти Володимир Зеленский айтиб ўтди.

Украина раҳбарининг сўзларига кўра, Россия Украинага кенг кўламли босқиннинг «биринчи сониясиданоқ» «БМТ Низоми бўйича ҳеч қандай тарзда оқлаб бўлмайдиган» халқаро жиноятларни содир этмоқда. «Путин шунчалик кўп халқаро нормалар ва қоидаларни буздики, энди Россияни тинчликка фақат мажбурлаш мумкин — бу урушда ягона тажовузкор, ягона бузувчи сифатида Россияни тинчликка мажбурлаш», — деди Зеленский БМТ Хавфсизлик кенгаши йиғилишлари залида.

Украина президенти БМТ Низоми ташкилотнинг барча аъзолари учун бир хил ва унга ҳамма тенг риоя этиши кераклигини таъкидлади. Унинг сўзларига кўра, Россия Украинадаги ҳаракатларини тушунтириш учун БМТ Низомига мурожаат қила олмайди, гарчи у буни «ўзининг бузилган дунёсида» қилса ҳам. Россия Федерацияси бошлаган уруш, Украинага ўзини ҳимоя қилиш ҳуқуқини берувчи БМТ Низоми кучга киргач, «ҳақиқатан» якунланади, деди Украина раҳбари.

«Урушни тугатиш йўли - тинчлик формуласи орқали»

У Киевни Путин билан музокаралар олиб боришга кўндирмоқчи бўлган давлатлар вакилларини танқид қилди: «Улар биз ўз халқимизни ҳимоя қилиш ҳуқуқидан фойдаланаётганимиз учун хафа бўлганини ёки урушни ва террорни фақат шундай давом эттиришни хоҳлаётганини нима деб тушуниш мумкин?»

Россиянинг Украинага қарши уруши кимдир ундан «чарчагани» ёки «Путин билан нимадир савдолашгани» учун тугамайди. Адолатли тинчликка фақат БМТ Низомини амалга ошириш орқали эришиш мумкин ва бу Украинанинг «тинчлик формуласида» ўз аксини топган», — деди Зеленский.

Зеленский БМТ давлатларини ушбу масала бўйича бирдамликка ва иккинчи глобал тинчлик саммитига тайёргарлик кўришга чақирар экан, Хитой ва Бразилияни алоҳида тилга олиб, уларни саммитда иштирок этишга таклиф қилди, бу биринчи учрашувда бўлмаган. Бундан ташқари, Украина президенти Эрон ва Шимолий Кореяни Россия Федерациясининг урушдаги «де-факто шериги» деб атади. «Уларнинг қуроллари бизни ўлдирмоқда, украиналикларни ўлдирмоқда ва Путинга бизнинг еримизни халқимиздан ўғирлашда ёрдам бермоқда», деди у.

Россия расмийлари аввалроқ Москва ноябр ойида бўлиб ўтиши керак бўлган иккинчи тинчлик саммитида иштирок этмаслигини бир неча бор таъкидлаган эди.

Зеленский РФни Украина АЭСга ҳужумлар тайёрлашда айблади

Володимир Зеленскийнинг сўзларига кўра, Киевда Россия қиш олдидан мамлакатнинг энергия таъминотини йўқ қилиш мақсадида Украинадаги учта атом электр станциясига ҳужумлар тайёрлаётгани ҳақида далиллар бор.

«Агар Россия шу қадар узоққа боришга тайёр бўлса, демак, сиз қадрлайдиган ҳар қандай нарса Москва учун аҳамиятсиз, у зарба беришда давом этади», деди у БМТ Хавфсизлик кенгаши аъзоларига. 

Аввалроқ Украина президенти девони раҳбари Андрей Ермак Россия Федерацияси Украинанинг бир нечта атом электр станцияларига ҳужумлар уюштиришни режалаштираётганини айтганди. Украина ташқи ишлар вазирлиги вакилларининг таъкидлашича, Киев бу вазият ҳақида АЭХА ва иттифоқчиларни аллақачон хабардор қилган. Ўз навбатида, АЭХА яна бир бор Россияни Запорижжя АЭСни деоккупация қилишга чақириб, атом электр станциясида давом этаётган ҳодисалар оқибатлари хавфини таъкидлади.