The Insider: Навалний колонияда заҳарланган бўлиши мумкин

Алексей Навалнийнинг колониядаги ўлими бўйича жиноий иш қўзғатишни рад этиш тўғрисидаги қарордан мухолифатчининг заҳарланишини кўрсатиши мумкин бўлган аломатлар тавсифи олиб ташланган, дея хабар беради The Insider.

Фото: Reuters

Тергов россиялик мухолифатчи Алексей Навалнийнинг Қутб доирасидан ташқаридаги «Қутб бўриси» (ИК-3) колониясида заҳарлангани ҳақидаги далилларни яширган бўлиши мумкин. Бу ҳақда 29 сентябр, якшанба куни чоп этилган The Insider материалида айтилади.

Нашр адлия майори Александр Варапаев томонидан имзоланган жиноят ишини қўзғатишни рад этиш тўғрисидаги қарорнинг икки вариантидан фойдаланиш имкониятига эга бўлди. Биринчисида айтилишича, 2024 йил 16 февралда Алексей Навалний юриш пайтида тўсатдан ўзини ёмон ҳис қилган, бу ҳақда хабар берган ва колония ҳовлисидан олиб чиқилган. Кейин сиёсатчи ерга ётган ва «қорнидаги ўткир оғриқдан шикоят қилган, ошқозонда рефлексли жараён бошланган ва у ҳушини йўқотган».

Қорин оғриғи, қусиш ҳақидаги сўзлар худди шу қарорнинг сўнгги версиясида йўқ, дея қайд этади The Insider. «Мусодара қилинган ашёлар» рўйхатига экспертиза учун тақдим этилган «қусуқ намуналари» ҳам киритилган, аммо на экспертиза, на қусиш ҳақида расман хабар берилмаган.

Сиёсатчининг беваси Юлия Навалная аввалроқ «у ўлими олдидан сўнгги дақиқаларда қорнидаги ўткир оғриқлардан шикоят қилгани»ни айтган эди. 2020 йилда «Новичок»дан заҳарланган Навалнийни Омск касалхонасида даволаган шифокор Александр Полупаннинг сўзларига кўра, ҳужжатларда тасвирланган аломатлар сиёсатчи яна заҳарланган бўлиши мумкинлигини кўрсатиши мумкин. Бу версияни расмийлар узоқ вақт давомида жасадни топширмагани ва биоматериалларни муқобил экспертизадан ўтказишга рухсат бермагани ҳам тасдиқлайди, дея таъкидлайди нашр.

Навалнийнинг ўлими: прокуратура иш қўзғатмаслик ҳақидаги қарорни бекор қилди

«Терговнинг Россия колониясида мухолифатчи Алексей Навалний ўлими юзасидан жиноий иш қўзғатмаслик ҳақидаги қарори прокуратура томонидан бекор қилинди», деб хабар берди сиёсатчи иттифоқчиси Иван Жданов 3 сентябр куни.

«Материал Россия Тергов қўмитасининг Ямал-Ненец автоном округи бўйича алоҳида муҳим ишларни тергов қилиш бўлимига юборилган», дейилади Россия Федерацияси ЯНАО прокуратураси қарорида. Жданов ўзининг Telegram-каналида унинг фотонусхасини жойлаштирди.

Унинг фикрича, бу қадам «жиноят иши қўзғатилишини англатмайди». Бу шуни англатадики, улар Алексей Навалнийнинг ўлдирилишини бошқача кўрсатиш ҳақида ўйлашади ёки текширув чексиз муддат давомида ўтказилади, деди Жданов.