Сентябр ойи учун инфляция даражаси маълум қилинди

Ўзбекистонда 2024 йил сентябр ойи якунларига кўра, инфляция 1,23 фоиз даражасида қайд этилди.

Статистика агентлиги хабарига кўра, йиллик инфляция (2023 йил сентябридан) деярли ўзгармади — 10,46 фоиз (бир ой аввал 10,47 фоиз эди), йил бошидан (январ-сентябр) эса нархлар ўртача 6,77 фоизга ошди.

Озиқ-овқат маҳсулотлари нархлари ўтган ойда ўртача 1,4 фоизга ошди (йиллик ҳисобда — 2,4 фоизга ўсиш). Ноозиқ-овқат маҳсулотлари нархи 0,8 фоизга (8,4 фоиз), пулли хизматлар нархи 1,5 фоизга (28,7 фоиз) ошди.

Гўшт нархи юқори суръатларда ўсишда давом этмоқда: мол гўшти — 3,1 фоизга (август ойида — 5,3 фоиз), қўй гўшти — 2,8 фоизга (август ойида — 4,9 фоиз) қимматлашди. Йил бошидан буён мол гўшти нархи 11,3 фоизга, қўй гўшти нархи эса 11,9 фоизга ошди.

Дори-дармонлар нархи ўсишда давом этмоқда, сентябр ойида у 1,2−1,9 фоиз (йил бошидан — 24,7 фоиз) оралиғида ошди.

Статистика агентлиги маълумотларига кўра, метан ойига 0,5 фоизга (йил давомида — 35,8 фоизга), бензин — 0,2−2,4 фоиз оралиғида ёки ўртача 0,8 фоизга (+13,8 фоиз) қимматлашди.