«Досье»: Навалний қўлини теккизган ҳамма нарса колониядан олиб чиқиб кетилди

Россия Тергов қўмитаси материалларига кўра, Алексей Навалний жазони ўтаган ва вафот этган 3-сонли ахлоқ тузатиш колониясидан ўлимидан олдин у алоқада бўлган барча буюмлар, жумладан, сиёсатчи ётган қор ҳам олиб чиқиб кетилди. Бу ҳақда 3 октябр, пайшанба куни «Досье» маркази журналистлар ихтиёрида бўлган тергов ҳужжатларига таяниб ёзди.

Хусусан, Навалнийнинг кийими матолари намунаси, кийими ва ички кийимлари (ички кийими олиб қўйилган ва алоҳида пакетга солинган), шахсий буюмлари, жумладан, ҳожатхона қоғози, озиқ-овқат намуналари, ювиниш анжомлари, камерадаги полдан намуналар, сиёсатчи ҳаётининг сўнгги дақиқаларини ёзиб олган бўлиши мумкин бўлган тўртта видеорегистратор ва ҳоказо мусодара қилинди.

Терговчилар шифокорларга ёрдам берган ва Навалний билан «алоқада» бўлган маҳкумлардан бирининг тиббий қўлқопларини ҳам олиб кетишган.

The Insider: Навалний колонияда заҳарланган бўлиши мумкин 

Тергов россиялик мухолифатчи Алексей Навалнийнинг Қутб доирасидан ташқаридаги «Қутб бўриси» (ИК-3) колониясида заҳарлангани ҳақидаги далилларни яширган бўлиши мумкин. Бу ҳақда 29 сентябр куни чоп этилган The Insider материалида айтилади.

Нашр адлия майори Александр Варапаев томонидан имзоланган жиноят ишини қўзғатишни рад этиш тўғрисидаги қарорнинг икки вариантидан фойдаланиш имкониятига эга бўлди. Биринчисида айтилишича, 2024 йил 16 февралда Алексей Навалний юриш пайтида тўсатдан ўзини ёмон ҳис қилган, бу ҳақда хабар берган ва колония ҳовлисидан олиб чиқилган. Кейин сиёсатчи ерга ётган ва «қорнидаги ўткир оғриқдан шикоят қилган, ошқозонда рефлексли жараён бошланган ва у ҳушини йўқотган».

Қорин оғриғи, қусиш ҳақидаги сўзлар худди шу қарорнинг сўнгги версиясида йўқ, дея қайд этади The Insider. «Мусодара қилинган ашёлар» рўйхатига экспертиза учун тақдим этилган «қусуқ намуналари» ҳам киритилган, аммо на экспертиза, на қусиш ҳақида расман хабар берилмаган.

Сиёсатчининг беваси Юлия Навалная аввалроқ «у ўлими олдидан сўнгги дақиқаларда қорнидаги ўткир оғриқлардан шикоят қилгани»ни айтган эди. 2020 йилда «Новичок»дан заҳарланган Навалнийни Омск касалхонасида даволаган шифокор Александр Полупаннинг сўзларига кўра, ҳужжатларда тасвирланган аломатлар сиёсатчи яна заҳарланган бўлиши мумкинлигини кўрсатиши мумкин. Бу версияни расмийлар узоқ вақт давомида жасадни топширмагани ва биоматериалларни муқобил экспертизадан ўтказишга рухсат бермагани ҳам тасдиқлайди, дея таъкидлайди нашр.