Apple саломатлик учун фойдали иловани синовдан ўтказди

Сўнгги йилларда Apple соғлиқни назорат қилиш билан боғлиқ йўналишларни фаол равишда ривожлантириб келмоқда. Глюкоза даражасини ноинвазив усулда назорат қилиш технологиясини ишлаб чиқиш тўғрисидаги миш-мишлардан сўнг, компания диабетолди ҳолатидаги фойдаланувчилар учун янги иловани синовдан ўтказишни бошлади.

Маълум қилинишича, иловани аллақачон Apple ходимлари синаб кўрган, қон таҳлилидан сўнг уларда иккинчи турдаги диабет хавфи аниқланган. Кўнгиллилар глюкозани ўлчаш учун турли хил қурилмалар ёрдамида шакар даражасини қайд этди, Apple иловаси эса уларга шакар даражасидаги ўзгаришларни ўз рационлари билан солиштиришга ёрдам берди.

Ғояга кўра, сервис фойдаланувчиларга овқатланиш одатларининг қондаги глюкоза даражасига таъсирини тақдим этиши керак. Бу эса овқатланишдан сўнг қанд миқдорининг кескин кўтарилишининг олдини олишга ёрдам беради. Масалан, фойдаланувчилар углеводга бой таомлар қондаги глюкоза миқдорининг кўтарилишига олиб келишини, оқсиллар ва клетчаткаларни қўшиш эса бу таъсирни қандай пасайтиришини аниқлаб олиши мумкин. Бундай ёндашув овқатланиш режимини ўз вақтида тўғрилаш ва қандли диабет ривожланишининг олдини олиш имкониятини беради.

Синов ишларининг тўхтатилиши ва кутилаётган истиқболлар

Ижобий натижаларга қарамасдан, Apple бошқа соғлиқни сақлаш мониторинги функцияларига эътиборини қаратиши учун лойиҳани вақтинча тўхтатди. Бироқ бу компаниянинг глюкоза назоратини интеграция қилиш ғоясидан воз кечаётганини англатмайди. Илова Apple яратаётган каттароқ тизимнинг бир қисмига айланиши мумкин. Бу тизим саломатликни яхшилаш ва касалликларнинг олдини олиш мақсадида овқатланиш ва глюкоза каби саломатлик кўрсаткичларини кузатиб боришни ўз ичига олади.

Ҳозирги вақтда Apple Health’да овқатланишни кузатиш функцияси йўқ. Apple’нинг синовлар давомида тўплаган маълумотлари платформани келгусида ривожлантириш учун асос бўлиб хизмат қилиши мумкин. Шу билан бирга, компания глюкоза мониторинги иловалари билан интеграциясини фаол равишда кенгайтирмоқда. Келажакда Apple қондаги шакар даражасини кузатиш учун тўлиқ интерфейс жорий қилса, бу иловага кўпроқ мослашувчанлик қўшади ва уни диабетолди ҳолатидаги фойдаланувчилар учун зарур воситага айлантиради.

Шуни таъкидлаш жоизки, бу илова Apple компаниясининг глюкоза даражасини инвазив бўлмаган усулда ўлчаш бўйича кенг қамровли ишланмаси билан тўғридан тўғри боғлиқ эмас. Маълум бўлишича, компания терини тешмасдан қондаги шакар миқдорини аниқлай оладиган қурилма прототипини ишлаб чиқмоқда. Ҳозирча Apple глюкозани тери орқали аниқлаш учун ёруғликдан фойдаланувчи технологияни яратиш имкониятларини ўрганмоқда, бироқ бундай қурилмани ишлаб чиқариш учун яна бир неча йил талаб этилади.