Android 16 операцион тизими ҳар доимгидан эртароқ чиқарилади

Android Headlines нашри ўз манбаларига таяниб, Android операцион тизимининг навбатдаги версияси қачон тақдим этилишини маълум қилди.

Фото: Donanimhaber

Инсайдерларга кўра, Android 16 операцион тизими 2025 йил 3 июн куни чиқарилади. Шу куни Google компанияси ўзининг Pixel смартфонларида янги тизимни намойиш этади. «Бу одатдагидан 2-3 ойга эрта», — дея изоҳ бермоқда мутахассислар.

Нашр хабарида қайд этилишича, операцион тизимнинг янги версиясини олдинроқ тақдим этилиши июл, август ва сентябрда чиқариладиган қурилмалар Android 16 нинг барқарор версиясига эга бўлишлари кераклигини англатади. Операцион тизимнинг турли хатоликларини бартараф этишга қаратилган иккинчи янгиланиши эса йил охирларига бориб тақдим этилади.

Журналистларнин таъкидлашича, Google операцион тизими энди Appleʼнинг ҳар сентябрда янгиланадиган iOSʼидан кўра эртароқ чиқади. Бундан ташқари, янги Pixel смартфонлари Android’нинг охирги версияси ўрнатилган ҳолатда сотувга чиқарилади.

Бир неча кун аввал Google корпорацияси Android 16 ни анъанавий равишда йил охирида эмас, балки 2025 йил ўрталарида тақдим этишини маълум қилганди. Компаниядагиларнинг тушунтиришича, операцион тизимнинг эрта янгиланиши «экотизимдаги қурилмаларнинг ишга туширилиш жадвалига яхшироқ мос келади».

#Google #Android