Лукашенко Беларус уйсизлар ва текинхўрлар билан «жиддий курашишини» айтди

Кейинги беш йил ичида Беларусда уйсизлар ва текинхўрлар йўқолади. Бу ҳақда президент Александр Лукашенко ўрим-йиғим кампанияси якунига бағишланган байрам тадбирида маълум қилди.

Унинг сўзларига кўра, афсуски, мамлакат фуқароларининг ҳаммаси ҳам жонбозлик кўрсатиб ишлашга тайёр эмас. Лукашенко ҳар бир инсон ўзи ва оиласи учун пул топиш мақсадида «қимирлаши» кераклигини таъкидлади.

«Биз ёрдам берамиз, иш билан таъминлаймиз. Фақат меҳнат қилинг. Одамларнинг яшашига халақит берадиганлар <...> биз сизлар билан жиддий шуғулланамиз, хафа бўлманглар», деди у.

Беларус раҳбари меҳнатга лаёқатли аҳолининг минтақалардан мамлакатнинг марказий қисмига оммавий кўчиб ўтишининг олдини олиш ҳукумат учун муҳим эканини таъкидлади. Унинг сўзларига кўра, муаммони ҳал қилиш учун фуқароларнинг муносиб турмуш тарзини таъминлаш ва мотивацияни ошириш зарур. Унинг қўшимча қилишича, давлат аппарати аҳолини қўллаб-қувватлашга мажбур.