Анталияда ёниб кетган SSJ билан аввалроқ 15 та авиаҳодиса юз берган

Сўнгги 3,5 йил ичида Анталияда ёниб кетган Sukhoi Superjet 100 бортида 15 та авиаҳодиса содир бўлди, улардан учтаси кузда юз берган, деб ёзади "Агентство. Новости".

Фото: Telegram / agentstvonews

Сочидан учган Россиянинг "Азимут" авиакомпаниясининг Sukhoi Superjet 100 (SSJ) бортида сўнгги 3,5 йил ичида 15 та авиаҳодиса содир бўлди, улардан учтаси кузда рўй берган. Бу ҳақда 25 ноябр, душанба куни "Агентство. Новости" хабар қилди.

RA-89085 рақамли самолёт 2017 йилнинг феврал ойида фойдаланишга топширилган. 2021 йил март ойидан бери Aviaincident ва "Авиаторщина" Telegram-каналлари лайнер билан боғлиқ 15 та ҳодиса ҳақида хабар берган.

Шундай қилиб, 7 сентябр куни машина техник сабабларга кўра учиш-қўниш йўлагидан тўхташ жойига қайтарилди, 28 сентябрда самолёт двигател тебраниши кучайганлиги сабабли парвозни тўхтатди, 16 октябрда эса SSJ гидравлик тизимнинг ишдан чиқиши туфайли мажбурий қўниш пайтида шассини шикастлади.

Superjet 100 самолёти Анталя аэропортига қўнганидан сўнг ёниб кетди

Россиянинг "Азимут" авиакомпаниясининг Сочидан учган Sukhoi Superjet 100 самолёти Туркиянинг Анталия шаҳри аэропортига қўнганидан сўнг ёниб кетди. 24 ноябр, якшанба куни содир бўлган воқеани Росавиация матбуот котиби Артем Кореняко ўзининг Telegram'даги каналида тасдиқлади.

Кейинроқ у Россиянинг Анталядаги бош консуллигига таянган ҳолда аниқлик киритишича, ҳодиса оқибатида самолёт йўловчиларидан ҳеч бири жабрланмаган. Самолёт командири йўловчиларни махсус траплар ёрдамида эвакуация қилишга қарор қилди. Авиакомпания қурбонлар йўқлигини тасдиқлади. Унинг қўшимча қилишича, "Азимут" ортга қайтиш учун захира самолёт тайёрламоқда. Туркия Транспорт вазирлиги маълумотларига кўра, самолётда 95 киши бўлган. Анталя аэропорти бортда 91 киши бўлганини маълум қилди.

Кореняконинг сўзларига кўра, кемадаги ёнғин Туркия аэропортининг қутқарув гуруҳи томонидан тезда ўчирилган.

AirportHaber Туркия авиация портали хабарига кўра, Superjet 100 двигатели ёниб кетган. Mash Telegram-каналининг ёзишича, самолёт қўниш вақтида чап қаноти билан учиш-қўниш йўлагига урилган бўлиши мумкин.

Авиакомпания маълумотларига кўра, Superjet кучли ёмғир ва шамол туфайли ноқулай об-ҳаво шароитида қаттиқ қўнганидан сўнг ёниб кетган.

#Анталия #SSJ