Италияда OpenAI компанияси 15 млн евро жаримага тортилди

Италиянинг маълумотларни ҳимоя қилиш билан шуғулланувчи назорат органи ChatGPT чатботига нисбатан терговини якунлаб, уни яратган OpenAI компанияси 15 миллион евро жаримага тортди, деб хабар беради Associated Press.

Garante маълумотлар махфийлигини назорат қилиш миллий органинининг маълум қилишича, тергов давомида OpenAI компанияси ChatGPT’ни такомиллаштиришда фойдаланувчиларнинг шахсий маълумотларини қайта ишлагани маълум бўлган. Компания белгиланган жаримани Италияда 2023 йилга кўрилган даромадидан 20 баробар кўпроқ эканини таъкидлаб, чиқарилган қарор юзасидан апелляция беришини билдирди.

Ўз навбатида OpenAI «бутун дунё бўйлаб махфийликни ҳимоя қилиш оргалари билан ҳамкорликка тайёрлигини ва бу борадаги қонунларни ҳурмат қилишини» қўшимча қилди.

Назорат органи маълумотларига кўра, ўтган йили бошланган тергов давомида OpenAI «ёшни текширишнинг самарали тизимини» тақдим эта олмаган, натижада, сунъий интеллект томонидан яратилган контентларни 13 ёшдан кичиклар ҳам кўришига йўл қўйилган бўлиши мумкин.

Италия ҳукумати, шунингдек, OpenAI’га ChatGPT бўйича жамоатчиликнинг хабардорлигини ошириш учун ОАВда олти ойлик кампанияни йўлга қўйиш мажбуриятини юклаган.

Аввалроқ OpenAI компаниясининг собиқ ходими Сучир Балажи Сан-Францискодаги квартирасида ўлик ҳолда топилганди. Сучир Балажи 2024 йил ёзида компанияни тарк этган ва октябр ойида ChatGPT дастурчиларини муаллифлик ҳуқуқи қонунларини бузганликда айблаган. У OpenAI бошқа одамларнинг контентидан рухсатсиз фойдаланаётганини таъкидлаб келган.