ChatGPT фойдаланувчилари сони уч йилда бир миллиардга етди

Уч йил ичида ойига бир миллиард фаол фойдаланувчи — бу кўрсаткич ChatGPT’ни тарихдаги энг тез оммалашган иловага айлантирди. Ушбу натижага эришиш учун Google Maps, TikTok ва YouTube’га беш йилдан саккиз йилгача вақт керак бўлганди.

Бу ихтисослашган консалтинг компаниясининг ҳисоб-китоби асосидаги маълумот бўлиб, унда фақат мобил иловадан фойдаланувчи фаол аудитория инобатга олинган ҳамда веб-версия ва дастурчилар учун интерфейс ҳисобга олинмаган.

Шу билан бирга, ҳисоб-китобларда иловани ҳар куни эрталаб очадиган одам билан ундан бир ойда бир марта фойдаланганлар ҳам бир хил тарзда ҳисобланган.

Яна бир жиҳат — ўсиш суръати. Агар ChatGPT бир йил ичида 62 фоизга ўсган бўлса, унинг асосий рақобатчиси бўлган Anthropic компаниясининг 56 миллион фойдаланувчига эга Claude иловаси 640 фоизлик ўсишни намойиш этмоқда.

Айни пайтда ChatGPT оммавий сегментда устунлик қилмоқда, Claude эса дастурчилар орасида ва корпоратив муҳитда мустаҳкам ўрин эгаллаган.

Ҳар икки компания бир-биридан бир неча ҳафталик фарқ билан биржага чиқишга тайёргарлик кўрмоқда.