Украина давлат реестрлари РФдан кенг кўламли киберҳужумга учради

Украина давлат реэстри сўнгги пайтлардаги энг йирик киберҳужумга учради. Бу ҳақда 19 декабр, пайшанба куни кечқурун бош вазирнинг Европа ва Евроатлантика интеграцияси бўйича ўринбосари, Украина адлия вазири Олга Стефанишина Facebookʼда маълум қилди. «Мақсадли ҳужум натижасида Украина Адлия вазирлиги тасарруфидаги Ягона ва Давлат реестрининг иши вақтинча тўхтатилди, энди биз гуруҳ ва бошқа хизматлар мутахассислари билан биргаликда киберҳужумларга қарши курашиш ва тизимларни тиклаш бўйича иш олиб боряпмиз», дейилади хабарда.

Вазир, шунингдек, бу ҳаракатлардан мақсад Украинанинг муҳим инфратузилмаси ишини бузишга уриниш эканини айтди ва «ҳужум россияликлар томонидан амалга оширилгани аллақачон аниқ бўлганига» аниқлик киритди.

Реестрларни тиклаш бўйича иш икки ҳафтагача давом этади

Айни пайтда мутахассислар шикастланган реестрларга «киришни босқичма-босқич тиклаш учун интенсив режимда» ишламоқда. Дастлабки баҳолашга кўра, Стефанишина таъкидлаганидек, бошқа ресурсларнинг ишлашига ҳеч қандай таҳдид йўқ. Унга кўра, биринчи навбатда, Фуқароларнинг ФҲДЁ давлат реестри, Юридик шахслар ва якка тартибдаги тадбиркорларнинг ягона давлат реестри ҳамда Кўчмас мулкка бўлган ҳуқуқларнинг давлат реестри тикланади.

«Дастлабки тикланиш вақти тахминан икки ҳафта давом этади», деди расмий. Унинг ишонтиришича, тўлиқ тикланишдан сўнг, келгусида шунга ўхшаш аралашувлардан ҳимояни кучайтириш учун тегишли органлар билан биргаликда ҳужум чуқур таҳлил қилинади. «Душман бу вазиятдан Украина ва хориждаги фуқаролар орасида ваҳима қўзғаш учун фойдаланишга ҳаракат қилмоқда, биз сизга барча муҳим янгиланишлар ҳақида қўшимча маълумот берамиз», деди Стефанишина.

Ўз навбатида, Украинанинг «Дія» портали фойдаланувчиларга давлат реестрлари мажбурий янгиланиши сабабли иловадаги баъзи хизматлар вақтинча ишламай қолгани ҳақида маълум қилди, деб хабар беради «Укринформ» агентлиги.