Берлинда пичоқли ҳужум: икки киши яраланди

Берлиннинг Шарлоттенбург районида содир этилган пичоқли ҳужум оқибатида икки киши яраланди. Швецияда яшовчи Сурия фуқароси гумонланувчи сифатида ҳибсга олинди. У супермаркетдан пичоқ ўғирлагани тахмин қилинмоқда.

Фото: Getty images / Bernd von Jutrczenka

Берлин ғарбида, Шарлоттенбург районида 31 декабр, сешанба куни пичоқли ҳужум оқибатида икки киши яраланди. Улардан бири ҳамон касалхонада, дея хабар беради Германия пойтахти полицияси.

Ҳуқуқ-тартибот идораларига кўра, фавқулодда хизматлар маҳаллий вақт билан соат 12:00 дан бироз олдин хабардор қилинган. Эркак бошқа одамларни пичоқлай бошлаган ва бир неча ўткинчилар буни тўхтатишга ҳаракат қилишган. Улар полиция етиб, уни ҳибсга олишдан олдин ҳужумчини тўхтата олди, деб ёзади Berliner Zeitung.

Полиция гумонланувчи Швецияда яшовчи Сурия фуқароси эканлигини айтди. Тахминларга кўра, у дўкондан пичоқни ўғирлаган. Berliner Morgenpost газетасининг ёзишича, ҳужумчи дастлаб Кведлинбургер-штрассе ва Зёммерингштрассе кесишмасидаги супермаркетга ташриф буюрганлардан бирига ҳужум қилган. Кейин у яқин атрофдаги меҳмонхона ташқарисидаги йўлакка борган.

«Дастлабки маълумотларга кўра, гумонланувчида руҳий касаллик белгилари бўлиши мумкин ва ҳеч қандай террорчилик мотивидан далолат йўқ», — деди полиция вакили Associated Press'га.

Ҳужум юзасидан тергов Берлин жиноят полицияси томонидан олиб борилмоқда.

#ҳужум #Берлин