Украина дронлари ҳужуми чоғида РФнинг бешта аэропорти ёпилди

1 январ, чоршанба куни кечқурун Россиянинг бешта аэропорти хавфсизлик нуқтайи назаридан ёпилди. Бу ҳақда Федерал ҳаво транспорти агентлиги (Росавиация) матбуот котиби Артем Кореняко маълум қилди.

Аэропортлар дрон ҳужумлари фонида ёпилди

«Фуқаролик самолётларининг парвозлари хавфсизлигини таъминлаш мақсадида бугун кечқурун бешта аэропортда вақтинчалик чекловлар жорий этилди», — деб ёзди у Telegramʼда. Кореняконинг сўзларига кўра, Калуга, Пенза, Саранск, Саратов ва Уляновск аэропортлари рейсларни қабул қилмайди ва жўнатмайди. Бир соатдан кейин у Калугада чекловлар олиб ташланганини эълон қилди.

Расмий аэропортларнинг вақтинча ёпилишининг аниқ сабабларини айтмади. Аммо чоршанба куни кечқурун Россия Мудофаа вазирлиги Марказий Россиянинг бир қанча ҳудудлари: Белгород, Курск, Воронеж, Брянск, Ростов, Тула ва Орёл областлари устида Украина учувчисиз учоқлари йўқ қилинганини эълон қилди.

Ростов области раҳбари Юрий Слюсар минтақа узра бешта дрон уриб туширилгани ҳақида хабар берди. Белгород области губернатори Вячеслав Гладков ҳам дрон ҳужуми ҳақида хабар берди.

Уруш бошланганидан бери Россиянинг 10 та аэропорти ёпиқ

Украинада уруш бошланганидан кейин деярли уч йил давомида Россия Федерациясининг марказий ва жанубий қисмларида тўққизта аэропорт ёпиқ қолмоқда: Анапа, Белгород, Брянск, Воронеж, Геленджик, Краснодар, Курск, Липетск, Ростов-Дон. Қримдаги Симферопол аэропорти ҳам ёпилган.