Туркиядаги курорт меҳмонхонада йирик ёнғин сабаб 10 киши ҳалок бўлди

Туркиянинг Болу вилоятидаги Карталкай тоғ-чанғи курорти меҳмонхонасида йирик ёнғин содир бўлди. Оқибатда 10 киши ҳалок бўлди, яна 32 киши жароҳат олди, деб хабар бермоқда Daily Sabah маҳаллий ҳокимиятга таяниб.

Ёнғин 21 январга ўтар кечаси 11 қаватли меҳмонхонанинг тўртинчи қаватида бошланган. Баъзилар ваҳима ичида ўзини деразадан ташлаб ҳалок бўлган.

Меҳмонхона биноси ёғочдан қурилгани сабабли, олов тез тарқалган. Ёнғинни ўчиришда 200 дан ортиқ қутқарувчилар иштирок этган.

Болу мэри Абдулазиз Айдин ёнғин сабаби ҳали аниқланмаганини маълум қилди. Унинг айтишича, аланга ресторан жойлашган қаватдан бошланган. Воқеа юз берган пайтда меҳмонхонада 234 нафар меҳмон бўлган. У ерда қанча ходим бўлгани ҳақида аниқ маълумот йўқ.

Карталкая тоғ-чанғи курорти Истанбул шаҳридан тахминан 270 километр узоқликда, Кероғлу тоғлари ҳудудида жойлашган машҳур дам олиш маскани ҳисобланади.