Ўзбекистон ва Ҳиндистон биргаликда заргарлик буюмлари ишлаб чиқаради

Ўзбекистон элчиси Сардор Рустамбоев Ҳиндистоннинг машҳур Sonani Industries Pvt. Ltd компанияси раиси Манеш Сонани билан учрашди.

Фото: "Дунё" АА

Sonani Industries Pvt. Ltd Гужарат штатининг Сурат шаҳрида жойлашган йирик компания бўлиб, юқори сифатли заргарлик маҳсулотлари билан ном қозонган.

Учрашув доирасида ҳиндистонлик саноатчиларга Ўзбекистонда сўнгги йилларда хориж ишбилармон доиралари вакиллари ва сармоядорлари фаолияти учун яратилган қулай ва жозибадор муҳит, жумладан, заргарлик соҳасини қўллаб-қувватлаш ва янада ривожлантириш бўйича кўрилаётган тизимли чора-тадбирлар ҳақида сўзлаб берилди.

Компания вакиллари мамлакат билан ҳамкорликда заргарлик буюмлари ишлаб чиқариш бўйича қўшма лойиҳани амалга оширишга чақирилди. Ушбу ҳамкорлик доирасида тақдим этиладиган имтиёз ва преференциялар тизимига алоҳида эътибор қаратилди.

Манеш Сонани Ўзбекистонда ҳаётга татбиқ этилаётган янгиланиш жараёнини катта қизиқиш билан кузатаётгани, амалий лойиҳаларни муҳокама қилиш учун Тошкентга сафар қилишга тайёргарлик кўраётганини маълум қилди.

Томонлар "Ўзбекзаргарсаноати" уюшмаси ва Sonani Industries Pvt. Ltd компанияси ўртасида ҳамкорлик муносабатларини ўрнатиш истиқболлари билан боғлиқ масалаларни батафсил муҳокама қилди.

#Ҳиндистон #заргарлик