Япония компанияси OpenAI’га 25 млрд долларгача инвестиция киритади

SoftBank ChatGPT сунъий интеллект чатботини яратган Америка компаниясининг энг йирик ҳомийларидан бирига айланиши мумкин. Ҳозирда компания OpenAI’га 25 млрд долларгача инвестиция киритиш бўйича музокаралар олиб бормоқда.

Фото: Getty images

Япониянинг SoftBank компанияси ChatGPT сунъий интеллект чатботини яратган Американинг OpenAI стартапига 25 миллиард долларгача инвестиция киритиш ниятида. Бу ҳақда Financial Times ва CNBC хабар берди.

FT’нинг қайд этишича, бундай сармоя SoftBank’ни OpenAI’нинг энг йирик молиявий ҳомийларидан бирига айлантиради. SoftBank ва компания АҚШнинг янги президенти Доналд Трамп эълон қилган Stargate сунъий интеллект лойиҳаси доирасида шерик ҳисобланади. Мазкур лойиҳа «сунъий интеллектнинг кейинги авлодини қўллаб-қувватлаш» ва маълумотларни қайта ишлаш бўйича кўплаб марказларни яратиш мақсадида ишга туширилган. Биринчи босқичда лойиҳага 100 миллиард доллар инвестиция киритилади ва кейинги тўрт йил ичида у 500 миллиард долларга етказилади.

SoftBank Stargate’га 15 миллиард доллардан ортиқ инвестиция киритиш ниятида, шунингдек, у OpenAI’га 15-25 миллиард доллар инвестиция киритиш бўйича музокаралар олиб бормоқда.

CNBC’га кўра, SoftBank аввал ҳам OpenAI’га инвестиция киритган, аммо камроқ миқдорда. Бунга қадар OpenAI’га Microsoft 13 миллиард доллар маблағ йўналтирган. ChatGPT ишга туширилганидан бери унинг қиймати 157 миллиард долларгача ошган.

Аввалроқ, Хитойнинг DeepSeek стартапи янги сунъий интеллект моделини тақдим этиши глобал молия бозорини ларзага солган, оқибатда Nvidia, OpenAI, Microsoft ва Google каби йирик технологик компаниялар акциялари нархи кескин тушиб кетган эди.

#SoftBank #OpenAI