АҚШ ва Канада ўзаро божларни вақтинча тўхтатди

АҚШ ва Канада расмийлари бир кун аввал ўрнатилган ўзаро божларни вақтинча олиб ташлашди. Икки мамлакат етакчилари 3 феврал, душанба куни бу ҳақда келишиб олдилар. Чекловлар икки кундан камроқ давом этди.

Трамп ва Трюдо божларни тўхтатишга рози бўлишди

Канада бош вазири Жастин Трюдо биринчи бўлиб йиғимлар вақтинча бекор қилинишини эълон қилди. У X ижтимоий тармоғида «президент Трамп билан яхши суҳбатдан кейин» аввал жорий қилинган тарифлар «биргаликда ишлашда давом этар эканмиз, камида 30 кунга тўхтатилади» деб ёзди.

Доналд Трамп TruthSocial'да «шанба куни эълон қилинган тарифлар Канада билан якуний иқтисодий келишув тузилиши мумкинлигини кўриш учун 30 кунга тўхтатилади» деб ёзди.

Ҳар икки етакчи, шунингдек, Оттава икки давлат чегарасини ҳимоя қилиш ва трансчегаравий наркотик моддалар савдосига қарши курашни кучайтириш учун 1,3 миллиард доллар сармоя киритишини айтди. «Канада бизнинг шимолий чегарамиз хавфсизлигини таъминлашга рози бўлди», деб ёзган Трамп.

Онтарио провинциясининг махсус сиёсати

Аввалроқ Онтарио бош вазири Даг Форд Трампнинг ҳаракатларига жавобан АҚШ фирмаларига қўшимча чекловлар жорий этишини ва Илон Маскнинг Starlink компаниясига интернет жиҳозларини етказиб бериш бўйича шартномани бекор қилишини айтган эди.

Душанба куни Форд ҳам жавоб тарифларини музлатиши ҳақида эълон қилди, аммо уларни қайта жорий этишга тайёрлигини яна бир бор таъкидлади. «Биз иқтисодиётимизга жиддий зарар етказиши мумкин бўлган тарифларни вақтинчалик тўхтатиб қўйдик, бу эса қўшимча музокаралар ўтказиш учун вақт беради», деб ёзди сиёсатчи X ижтимоий тармоғида.

«АҚШ божлари тўхтатилгач, Онтарио ҳам бизнинг жавоб чораларимизни тўхтатади. Агар президент Трамп тарифларни жорий этишда давом этса, биз Онтариодаги дўконлар пештахталаридан Америка маҳсулотларини олиб ташлашдан ёки Америка компанияларига провинциямиздан товарлар олиб кетишни тақиқлашдан тортинмаймиз. Канада ва Онтарио тарифлар таҳдидига қарши туради», дея қўшимча қилди Форд.