NYT: Эрон ядровий қурол яратишнинг нисбатан қисқа йўлини ўрганмоқда

АҚШ разведкаси маълумотларига кўра, эронлик олимлар ошиб бораётган ядровий ёқилғи захирасини бир йил ёки ундан ортиқ муддатда эмас, балки бир неча ой ичида ишлайдиган қуролга айлантиришнинг қисқа йўлини қидирмоқда.

Фото: The New York Times

Эронлик муҳандислар ядровий қуролни нисбатан тезроқ яратиш усулларини ўрганмоқда. Бу ҳақда The New York Times бир нечта америкалик амалдорга таяниб хабар берди.

NYT манбаларининг айтишича, янги разведка маълумотлари Жо Байден маъмуриятининг охирги ойлардаги фаолияти давомида тўпланган, кейин эса Трампнинг миллий хавфсизлик жамоасига топширилган.

Разведка маълумотларига кўра, эронлик олимлар ошиб бораётган ядровий ёқилғи захирасини бир йил ёки ундан ортиқ муддатда эмас, балки бир неча ой ичида ишлайдиган қуролга айлантиришнинг қисқа йўлини қидирмоқда.

Америкалик амалдорларнинг узоқ йиллик баҳолашларига кўра, юқори бойитилган уранни (90 фоизгача ёки ундан юқори) баллистик ракетага ўрнатса бўладиган мураккаб жанговар каллакка айлантириш учун Эронга 1 йилдан 1,5 йилгача вақт талаб этилади.

Шу билан бирга Эрон президенти Масъуд Пизишкиён ҳамда мамлакат Ташқи ишлар вазирлиги Ислом инқилоби муҳофизлари корпуси нима устида иш олиб бораётгани ва ядровий ихтиролардан бехабар бўлиши мумкин.

2018 йилда Доналд Трамп ўзининг биринчи президентлик муддати давомида АҚШнинг ядровий дастур бўйича битимдан чиқишини эълон қилганидан кейин Теҳрон уран ишлаб чиқаришни қайта бошланган. Axios’га кўра, Жо Байденнинг президентлик муддати давомида Эроннинг ядровий дастури «сезиларли даражада олдинга силжиган». 2023 йил декабр охирларида МАГАТЭ Эрон 60 фоизгача бойитилган уранни ишлаб чиқариш суръатларини оширганини маълум қилган эди.

Ўз навбатида Эрон ўзига қўйилган санкцияларнинг олиб ташланиши ва шу орқали Европа давлатлари билан ядровий дастури муҳокамасини қайта тиклашга интилмоқда. Эроннинг Буюк Британия, Германия ва Франциядан иборат E3 номли гуруҳ вакиллари билан биринчи музокаралар раунди 2024 йил ноябрда бўлиб ўтганди.