Қозоғистонда келин ўғирлаганлик учун жиноий жазо жорий қилинади

Қозоғистон парламенти депутатлари Жиноят кодексига келин ўғирлаганлик учун жазо чораларини киритишни таклиф қилишди. Ўзгартиришлар яқин вақт ичида қабул қилиниши режалаштирилган. Бу ҳақда депутат Мурат Абенов маълум қилди, деб хабар берди Vlast.kz.

Унга кўра, таклиф ҳозир Жиноят, Жиноят-ижро ва Жиноят-процессуал кодексларини оптималлаштириш бўйича ишчи гуруҳ томонидан кўриб чиқилмоқда. Янги моддада вазиятга қараб турли жазо чоралари кўзда тутилган: жарима, жамоат ишлари ва қамоқ.

«Агар бир гуруҳ шахслар томонидан, вояга етмаган шахсга нисбатан содир этилган бўлса, бирор бир зарар етказилган бўлса, уч йилдан беш йилгача озодликдан маҳрум қилиш жазоси қўлланади. Агар ўз хоҳишингизга қарши уйда сақлансангиз, психологик ва жисмоний босимга дучор бўласиз. Қонун жабрланувчи томонида бўлиши керак», деб таъкидлади Абенов.

Унинг қўшимча қилишича, келин ўғирлаш баъзан «урф-одат» сифатида ниқобланади, лекин аслида шундай эмас. «Аслида бизда бундай анъаналар йўқ эди. Қизнинг ўзи турмушга чиқмоқчи бўлса, ота-онаси рози бўлмаса, қиз қочиб кетган. Ота-онасининг моддий имконияти бўлмаганида, у қочиб, ўзи турмушга чиқиши мумкин эди. Қозоқларда ҳеч қачон қабиладан қиз ўғирлаш одати бўлмаган, бу ҳар доим оғир жиноят бўлиб келган», деди депутат.

Қозоғистон жиноий қонунчилигида ҳалигача келин ўғирлаш бўйича алоҳида модда йўқ. Республикада бундай ишлар бўйича айбланувчилар одатда «одам ўғирлаш» моддаси бўйича судланади, бу моддада 15 йилгача озодликдан маҳрум қилиш жазоси назарда тутилган (аммо унда ўғирланган шахсни ўз ихтиёри билан озод қилган шахс, агар ҳаракатларида бошқа жиноят таркиби бўлмаса, жавобгарликка тортилмайди деган банд бор).