2024 йилда аҳоли даромадларининг реал ўсиш суръати 8,1 фоиз бўлди

2024 йилда Ўзбекистон аҳолисининг умумий даромадлари 896,3 триллион сўмга етди. Бу ҳақда Статистика агентлиги ҳисоботида келтириб ўтилган.

Ўтган йилда аҳоли даромадларининг номинал кўринишдаги ўсиши 18,5 фоизни, реал ўсиш суръати эса 8,1 фоизни ташкил этган.

Аҳоли жон бошига умумий даромадлар эса номинал қийматда 16,1 фоизга, реал кўринишда 5,9 фоизга кўпайди. Натижада 2023 йилда аҳоли жон бошига йиллик ўртача даромад 20 миллион сўм бўлган бўлса, 2024 йилда бу кўрсаткич 24,1 миллион сўмга етди.

Ҳудудлар кесимида даромадларнинг энг юқори кўрсаткичи Тошкент шаҳри (60 млн 594,4 минг сўм), Навоий (38 минг 112,3 минг сўм), Бухоро (27 минг 508 минг сўм) ва Тошкент (25 млн 123,3 минг сўм) вилоятларида қайт этилган. Пойтахт ва 3 та вилоятда аҳоли жон бошига умумий даромадлар республикадаги умумий кўрсаткичдан баланд бўлган.

Бу борадаги энг қуйи кўрсаткичлар Наманган вилояти (16 минг 849 минг сўм), Қорақалпоғистон Республикаси (16 млн 858 минг сўм) ва Сурхондарё вилоятида (17 млн 880 минг сўм) қайд этилган.

Аҳоли жон бошига даромадларнинг энг юқори реал ўсиши Тошкент шаҳри (15,4 фоиз), Навоий (7,9 фоиз) ва Тошкент (6,4 фоиз) вилоятларида кузатилган. Сурхондарё (0,2 фоиз), Наманган (0,5 фоиз) ва Фарғона вилоятларида (1,1 фоиз) аҳолининг реал даромадлари жуда кам миқдорда ўсган.

Аҳолининг умумий даромадлари таркиби

2024 йилда аҳолининг умумий даромадлари ҳажмининг сезиларли даражада ўсиши асосан умумий даромадлар таркибида 27,9 фоиз улушга эга бўлган ёлланма ишчиларнинг даромадлари ва 35 фоиз улушга эга мустақил равишда банд бўлишдан олинган даромадлар ҳамда 26 фоизни ташкил этувчи трансфертлардан олинган даромадларнинг сезиларли ўзгариши ҳисобига юзага келган.

2024 йилнинг январ-декабр ойлари маълумотларига кўра, трансфертлардан олинган даромадларнинг 2023 йилнинг мос даврига нисбатан номинал ўсиш суръати 13,7 фоизни ташкил этган. Ушбу даврда аҳолининг умумий даромадлари ҳажмида трансфертларнинг улуши 26 фоиз бўлган.