Зеленский Пиотровский ва бошқа россияликларга қарши санкциялар киритди

Украина президенти Володимир Зеленский Украина Миллий хавфсизлик ва мудофаа кенгашининг «Украина маданий ўзига хослигини йўқ қилиш учун масъул бўлган» русларга, шунингдек, нефтни бир баррел учун 60 доллардан юқори нархда ташийдиган танкер капитанларига қарши санкциялар қўллаш тўғрисидаги қарорини кучга киритди. Бу ҳақда 5 феврал, чоршанба куни Украина президенти девони раҳбари Андрей Ермак ўзининг Telegram-каналида ёзди.

Чекловга дучор бўлган танкер капитанлари рўйхати 57 кишига кенгайтирилди. Улардан 56 нафари Россия фуқароси, бири эса Эрон фуқароси.

Иккинчи фармон билан 55 нафар шахсга нисбатан жазо чоралари қўлланган. Улар орасида Эрмитаж бош директори Михаил Пиотровский, Қрим ҳудудида «ноқонуний қазишмаларда бевосита иштирок этган» археологик экспедициялар раҳбари Сергей Соловёв, маданият вазири ўринбосарлари Владимир Осинцев ва Сергей Обривалин ҳамда бошқалар бор.

Дания «соядаги флот» танкерларини текширади

Аввалроқ Дания денгиз бошқармаси атроф-муҳит ва денгизчилар учун хавф туғдириши мумкин бўлган танкерларга хавфсизлик чораларини кучайтиришини маълум қилган эди. Идора «Дания бўғозлари орқали нефт ташувчи эски кемаларнинг фаолияти»га жавобан шундай қарор қабул қилганини билдирди.

«Портнинг давлат назорати танкерларга қаратилган, чунки танкерларнинг шикастланиши ёки ҳалокати билан боғлиқ авария хавфсизлик, соғлиқ ва атроф-муҳит учун айниқса жиддий оқибатларга олиб келиши мумкин», дейилади баёнотда.