Фезер: Россия Германиядаги диверсияларга алоқадор бўлиши мумкин

Германия ички ишлар вазири Ненси Фезер автомобил тутун чиқаргичларида қурилиш кўпиги қўлланган қўпорувчилик ортида Россия турган бўлиши мумкинлигини инкор этмади. Бу ҳақда у 6 феврал, пайшанба куни dpa агентлигига маълум қилди.

«Биз бу Россиянинг диверсияси бўлиши мумкинлиги ҳақидаги шубҳаларни жиддий қабул қиламиз. Ҳозирда тергов қизғин давом этмоқда ва биз вазият тўлиқ ойдинлашгунча кутишимиз керак», — дея унинг сўзларидан иқтибос келтиради журналистлар. Бироқ, вазирнинг сўзларига кўра, «Россия таъсири операциясини» инкор этиб бўлмайди.

Фезернинг таъкидлашича, Кремл кўпинча разведка хизматлари номидан ҳаракат қиладиган, аслида уларга тегишли бўлмаган махсус воситачилардан фойдаланади. Бундан ташқари, Москва, деб ҳисоблайди сиёсатчи, «Бундестагга сайловларга таъсир ўтказишдан манфаатдор».

Германия расмийлари Россияни юзлаб машиналарга зарар етказганликда гумон қилмоқда

Германия полицияси бир вақтнинг ўзида бир нечта федерал ерларда автомобилларга атайлаб зарар етказиш орқали содир этилган бир қатор қўпорувчилик ҳаракатларини текширмоқда. Шу билан бирга, Россия махсус хизматларидан бирининг ушбу серияга алоқадор эканлигига шубҳалар текширилмоқда, деб хабар берди dpa агентлиги 5 феврал куни Германия хавфсизлик хизматидаги манбаларга таяниб. Агентлик суҳбатдошига кўра, дастлабки тергов маълумотларига қараганда, диверсантлар ўз ҳаракатлари учун россиялик буюртмачидан пул олган.

Аввалроқ Der Spiegel ҳафталиги Берлин, Баден-Вюртемберг, Бавария ва Бранденбургдаги 270 дан ортиқ автомобилнинг тутун чиқаргичлари полиуретан кўпик билан тўлдирилганига боғлиқ ҳодисалар юзасидан ўтказилган терговнинг биринчи натижаларини эълон қилган эди. Ўтган йилнинг декабр ойида Шёнефелд Бранденбург жамоатида полициячилар фургонни текшириш чоғида бир нечта қурилиш кўпиги бўлган канистрларни аниқладилар, унда Германия жанубида яшовчи уч йигит – сербиялик, босниялик ва германиялик шахс бўлган. Орадан кўп ўтмай, 43 та автомобил эгалари тутун чиқаргичларида шундай кўпик пайдо бўлганини аниқлаб, полицияга мурожаат қилган.