Трамп АҚШ Махфий хизматидан ўзини ўлдирмоқчи бўлганлар ҳақида маълумот сўради

Энди Байден туфайли буни яширишга ҳожат йўқ, деди АҚШ раҳбари.

Фото: AP

АҚШ президенти Доналд Трамп АҚШ Махфий хизматига 2024 йилги сайлов кампанияси вақтида ўзига суиқасд уюштиришга уринган шахслар ҳақидаги барча маълумотларни тақдим этишни буюрганини айтди. Бу ҳақда The New York Post ёзди.

«Мен икки қотил ҳақида билмоқчиман... Нима учун бир йигитда олтита уяли телефон, иккинчисида (хорижий) иловалар бор эди? …Энди Байден туфайли буни яширишга ҳожат йўқ. Мен билишга ҳаққим бор», деди сиёсатчи.

2024 йил 13 июлда Доналд Трамп Пенсилваниядаги сайловолди ташвиқоти митингида суиқасддан омон қолди. Сиёсатчи қулоғидан жароҳатланди. 2024 йил сентябрь ойида Трамп гольф ўйнаётган вақтда яна бир суиқасд уриниши содир бўлди. Ўқ узган шахс қўлга олинди, сиёсатчига зарар етмаган.

Январь ойида Доналд Трамп суиқасд пайтида ўзини ҳимоя қилган Шон Курранни Махфий хизматнинг янги раҳбари этиб тайинлади.