АҚШ ва Эрон ўртасида Кўрфаздаги урушни тўхтатиш бўйича меморандум шу якшанба – 14 июнь куниёқ имзоланиши мумкин. Бу ҳақда Ғарбдаги дипломатик манбаси таяниб Reuters маълумот берди.
Манбага кўра, меморандум матни ҳали ҳам якуний босқичда кўриб чиқилмоқда. Хусусан, Эрон келишув Ливандаги жангларни ҳам тўхтатиши керак деган ўз позициясида қатъий турибди. Ливан жанубига бостириб керган Исроил у ерда Ҳизбуллоҳ билан кураш олиб бормоқда.
Мақсад шанба кунигача келишувни матн шаклини якунлашдан иборат. Токи битим АҚШ вице-президенти Ж.Д. Вэнс ва Эрон парламенти спикери Муҳаммад Боқир Ғолибоф томонидан имзоланиши мумкин бўлсин, дейди манба. Ҳозирча учрашувнинг аниқ жой белгиланмаган, бироқ Швецариянинг Женева шаҳри энг эҳтимолий вариант бўлиб турибди.
Эронга ён босилаётгани айтилмоқда
Reutersʼнинг Эрон расмийларига таяниб ёзишича, улар тавсифланган келишув шартлари Теҳронга у талаб қилган нарсаларнинг аксарият қисмини тақдим этаётганга ўхшайди. Трамп эса Эрон ёпиб қўйган Ҳўрмуз бўғозининг қайта очилишидан ташқари, ўзи истаган нарсалардан жуда кам қисмини қўлга киритгандек кўринмоқда.
Эроннинг юқори мартабали амалдорига кўра, келишув лойиҳаси – Эрон нефтига қўйилган санкцияларни бекор қилади, унинг миллиардлаб долларлик маблағларини музлатишдан чиқаради ва барча фронтларда, жумладан Ливанда ҳам ҳарбий ҳаракатларни тўхтатишни талаб қилади.
Ядровий масалалар кейинги музокаралар учун четга суриб турилади. Вашингтон Эрон ҳеч қачон ядро қуролини ишлаб чиқармаслигини таъминлайдиган келишувни хоҳлайди. Эрон эса бундай қуролга интилмаётганини айтади.
Теҳрондаги манба Эрон бунинг эвазига нима таклиф қилиши мумкинлиги ҳақида ҳеч нарса айтмаган. АҚШ ҳозирча муносабат билдирмади.
Эроннинг «Меҳр» ахборот агентлигига кўра, шартлар – АҚШнинг бошқа муҳим ён беришларини ҳам ўз ичига олади. Жумладан, ўз кучларини Эрон атрофидан олиб чиқиб кетиш мажбурияти ва вайрон бўлган Эрон иқтисодиётини қайта тиклаш режасини тақдим этиш шулар жумласидандир.
«Қўшма Штатлар ва унинг иттифоқчилари Эронни қайта тиклаш учун қиймати камида $300 миллиард бўлган режаларни тақдим этишлари керак»
