Ўзбекистон қишки Осиё ўйинлари тарихида иккинчи яхши натижасини кўрсатди

Ўзбекистон спортчилари Хитойнинг Ҳарбин шаҳрида ўтаётган қишки Осиё ўйинларидаги иштирокини битта олтин медал билан якунлади. Бу ўйинлар тарихидаги иккинчи энг яхши натижа бўлди.

Бундан олдин, 1999 йилда Жанубий Кореянинг Кангвон шаҳрида ўтган Осиё ўйинларида ўзбекистонликлар 3 та медал (олтин + кумуш + бронза) билан энг яхши натижага эришган эди.

Ҳарбин шаҳрида ўтаётган мусобақада олтин медални фигурали учиш бўйича терма жамоа аъзолари Дмитрий Чигирев ҳамда Екатерина Гейниш келтирди.

Умумжамоа ҳисобида Хитой 32 олтин, 26 кумуш ва 24 бронза билан биринчи ўринни эгаллади. Ўзбекистонликлар (1-0-0) Жанубий Корея (15-14-13), Япония (9-11-14) ва Қозоғистондан (3-8-7) кейин бешинчи ўринда бормоқда. Мусобақа эртага якунланади.

Ўзбекистонлик бошқа спортчиларнинг натижалари қандай бўлди? Шорт-трек бўйича Даниил Ейбог 500 метр масофага кечган баҳсда еттинчи натижани қайд этди. Шунингдек, у 1500 метр масофада ҳам иштирок этиб, яримфиналгача борди.

Тоғ чанғиси бўйича слалом йўналишида Сабина Режепова 15-, Валерия Ковалёва 17-, Мария Морова 23-ўринни қайд этди. Ксения Григориева трассада хатога йўл қўйгани учун дисквалификация қилинди.

Конькида югуриш бўйича Данила Семериков 5000 метр масофага кечган баҳсда 6-ўринни эгаллади.

Тоғ чанғиси слалом дастурида Арман Гаюпов 6-, Никита Горковский 14-ўринни қайд этди. Медет Назаров баҳс давомида белгиланган йўналишдан чиқиб кетиб, иштирокини тугата олмади.

Биатлончилар Дилмурод Абдураҳмонов ҳамда Ролан Раимқулов 10 км масофага кечган спринт пойгасида мос равишда 31- ва 25-ўринни эгаллади.

Чанғи альпинизми бўйича беллашувларда Ўзбекистон 12-натижани қайд этди.

Фигурали учишда Нигинабону Жамолиддинова 17-ўринни, Севинч Раҳимова 22-ўринни эгаллади.

Ўзбекистоннинг қишки Осиё ўйинларидаги натижалари:

- 1996 йил, Ҳарбин (Хитой) – 0 олтин – 1 кумуш – 1 бронза;

- 1999 Кангвон (Жанубий Корея) – 1-1-1;

- 2003 Аомори (Япония) – 0-0-1;

- 2007 Чангчун (Хитой) – 0-0-1;

- 2011 Астана (Қозоғистон) – 0-0-0;

- 2017 Саппоро (Япония) – 0-0-0;

- 2025 Ҳарбин (Хитой) – 1-0-0.