Букри кит одамни ютиб юбориб, сўнг туфлаб ташлади — видео

Чилида букри кит 24 ёшли байдаркачини қисқа муддатга ютиб юбориб, сўнг туфлаб ташлади, деб хабар беради CNN.

Қайд этилишича, мазкур ҳодисани байдаркачининг отаси тасвирга олишга муваффақ бўлган. Магеллан бўғозида сув остидан чиқиб келган кит бир неча сонияга Адриан Симанкасни ютиб юборган.

«Ўгирилганимда юзимда шилимшиқ нарсани ҳис қилдим, қора-кўк ва оқ рангларни, ортимдан нимадир яқинлашганини кўрдим. Ўша онда мен ҳеч нарса қила олмаслигимни, ўлиб кетишимни ўйладим», — дея эслайди Адриан.

Ноаниқликларга қарамай, йигит қутқарув нимчаси уни юқорига кўтараётганини ҳис қилган ва бир неча сониядан кейин эса яна сув юзасига қалқиб чиққан.

Адрианнинг отаси Деллнинг сўзларига кўра, у «чиройли тўлқинлар»ни пайқаган заҳоти ҳолатни тасвирга олишни бошлаган.

«Ушбу жонзот инсон катталигидаги ўлжаларни ов қилмайди», — дейди Ванесса Пиротта исмли олим.

Магеллан бўғози ўзининг табиати билан машҳур туристик йўналишлардан ҳисобланади. Делфинлар ва кўк китлар орасида байдаркада сузиш — ҳукуматнинг туристик сайтида реклама қилинадиган кўнгилхушликлардан биридир.